އީރާނާއެކު މިހާރު ހިނގަމުންދާ ވަރުގަދަ އަސްކަރީ ކުރިމަތިލުންތައް ހުއްޓާލުމުގެ އެއްބަސްވުމަކަށް އައުމަށް އެމެރިކާ އަދި ތައްޔާރު ނޫން ކަމަށް އެ ގައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެންބީސީ ނިއުސްއަށް ދެއްވި ފޯނު އިންޓަވިއުއެއްގައި ޓްރަމްޕް ވިދާޅުވީ، އީރާނުން އެއްބަސްވުމަކަށް އަންނަން ބޭނުންވި ނަމަވެސް، އެއްބަސްވުމުގެ ޝަރުތުތައް އަދި އެކަށީގެންވާ މިންވަރަށް ރަނގަޅު ނޫން ކަމަށެވެ. މީގެ އިތުރުން، ދުނިޔޭގެ ބާޒާރުގައި ތެލުގެ އަގު އުފުލުމާ ގުޅޭގޮތުން ހުރި ކަންބޮޑުވުންތަކަށް ޓްރަމްޕް މާބޮޑު ސަމާލުކަމެއް ނުދެއްވައެވެ. އަދި ހޮރްމޫޒް ކަނޑުއޮޅިން އުޅަނދުފަހަރަށް ރައްކާތެރިކަމާއެކު ދަތުރުކުރެވޭނެ އިންތިޒާމު ހަމަޖެއްސުމަށް އެހެން ގައުމުތަކާ ގުޅިގެން މަސައްކަތް ކުރަމުންދާކަން އޭނާ ތަކުރާރުކުރެއްވިއެވެ.

Ad by Hajj Corporation

ޓްރަމްޕްގެ އިންޓަވިއުގައި އީރާނުގެ އާ ރޫހީ ލީޑަރު މުޖްތަބާ ޚާމަނާއީ ދުނިޔޭގައި ހުރިތޯ ސުވާލު އުފައްދަވާފައިވެއެވެ. އަދި އީރާނުގެ ޚާރްޖް އައިލެންޑަށް އެމެރިކާއިން ދިން ހަމަލާތަކުގައި އެ ރަށުގެ ބޮޑު ބައެއް "ސުންނާފަތިކޮށްލާފައިވާ" ކަމަށް ވިދާޅުވެ، އެ ސަރަހައްދަށް އިތުރު ހަމަލާތަކެއް ދީފާނެ ކަމުގެ އިންޒާރުވެސް ޓްރަމްޕް ދެއްވިއެވެ.

ހޮރްމޫޒް ކަނޑުއޮޅީގައި އީރާނުން މައިން ވަޅުލާފައިވާކަން އަދި ސާފުނުވި ނަމަވެސް، އެ ސަރަހައްދު ސާފުކުރުމުގެ މަސައްކަތް ބައިނަލްއަގުވާމީ ބައިވެރިންނާއެކު ވަރުގަދައަށް ކުރިއަށްގެންދާނެ ކަމަށް އޭނާ ވިދާޅުވިއެވެ.

މި ހަމަލާތަކާ ގުޅިގެން މަސްރަހު އިތުރަށް ގޯސްވެފައިވާއިރު، އެމެރިކާގެ އަސްކަރީ މަރުކަޒުތަކަކީ ހަމަލާދެވިދާނެ އަމާޒުތަކެއް ކަމަށް އީރާނުން ވަނީ ބުނެފައެވެ.