މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ސަރުކާރުން ކުރިއަށްގެންދާ ގިރާވަރުފަޅު ހިއްކުމުގެ މަޝްރޫއު، އަންނަ އޭޕްރިލް މަހުގެ ނިޔަލަށް އެއްކޮށް ނިންމާލެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު އިއުލާނު ކުރައްވައިފިއެވެ.

މި މަޝްރޫއުގެ މަސައްކަތް ކުރިއަށްދާ ގޮތުގެ އެންމެ ފަހުގެ މައުލޫމާތު ހިއްސާކުރައްވަމުން ރައީސް ވިދާޅުވީ، ކޮންމެ ދުވަހަކުވެސް މެދުނުކެނޑި ބިން ހިއްކުމުގެ މަސައްކަތް ބާރުސްޕީޑުގައި ކުރިއަށްދާ ކަމަށެވެ.

Ad by Hajj Corporation

"އިރާދަކުރެއްވިއްޔާ އޭޕްރިލް މަހު އެއްކޮށް ނިމި، ސަރވޭ ކޮށް ނިންމާ ޖޫން މަހު ގޯތިތައް ހަވާލުކުރުމުގެ މަސައްކަތް ފެށޭނެ،" ރައީސް ވިދާޅުވިއެވެ.

ގިރާވަރުފަޅު ހިއްކުމުގެ އަމަލީ މަސައްކަތް ފަށާފައިވަނީ ހުޅުމާލެ ފޭސް 3 ހިއްކުމުގެ މަސައްކަތް އެއްކޮށް ނިންމާލުމަށްފަހުގައެވެ. މި މަޝްރޫއު އަވަސްކުރުމުގެ ގޮތުން ސަރުކާރުން ވަނީ ހާއްސަ ދެ ޑްރެޖަރެއް ބޭނުންކުރަން ފަށާފައެވެ. އެމްއޭސީއެލް އާ ހަވާލުކޮށްގެން ކުރިއަށްގެންދާ މި ބިޔަ މަޝްރޫއުގެ ދަށުން ބިން ހިއްކުމުގެ މަސައްކަތް އަލުން ފަށާފައިވަނީ 30 ޖޫން 2026 ގައެވެ.

ގިރާވަރުފަޅުން ދޫކުރުމަށް ހަމަޖެހިފައިވާ ގޯތިތަކުގެ ތަފްސީލަށް ބަލާއިރު، ތަފާތު ސައިޒުތަކުގެ ގިނަ އަދަދެއްގެ ޕްލޮޓްތައް ހިމެނެއެވެ. އެގޮތުން:

1,250 އަކަފޫޓުގެ 2,605 ޕްލޮޓް

1,650 އަކަފޫޓުގެ 1,213 ޕްލޮޓް

2,050 އަކަފޫޓުގެ 253 ޕްލޮޓް

2,450 އަކަފޫޓުގެ 1 ޕްލޮޓް

މި މަޝްރޫއަކީ މާލޭ ސަރަހައްދުގެ ތޮއްޖެހުން ކުޑަކޮށް، ރައްޔިތުންނަށް ފަހި ބޯހިޔާވަހިކަމެއް ކަށަވަރުކޮށްދިނުމަށް ރައީސް ޑރ. މުޢިއްޒުގެ ސަރުކާރުން ދެއްވާ ހާއްސަ އިސްކަމުގެ ދަށުން ކުރިއަށްގެންދާ މުހިންމު މަސައްކަތެކެވެ. ބިން ހިއްކައި ނިމުމާއެކު، ބިން ސަރވޭކުރުމުގެ މަސައްކަތް ނިންމައި، ކަނޑައެޅިފައިވާ ތާވަލާ އެއްގޮތަށް ޖޫން މަހުގެ ތެރޭގައި ރައްޔިތުންނަށް ގޯތިތައް ހަވާލުކުރުމުގެ އިންތިޒާމުތައް ސަރުކާރުން ހަމަޖައްސަވާނެއެވެ.