ސްޕެނިޝް ލަލީގާގައި ރޭ ކުޅުނު މެޑްރިޑް ޑާބީގައި ވާދަވެރި އެތުލެޓިކޯ މެޑްރިޑް 3-2 އިން ބަލިކޮށް، ރެއާލް މެޑްރިޑުން ތާވަލުގެ އެއްވަނައިގައި އޮތް ބާސެލޯނާއާ ދެމެދު އޮތް ފަރަގު ކުޑަކޮށްފިއެވެ. މި މެޗުގައި ރެއާލްގެ ވިނީޝިއަސް ޖޫނިއާ ދެ ލަނޑު ކާމިޔާބުކުރިއިރު، މެޗުގެ ފަހުކޮޅު ފެޑެރިކޯ ވަލްވާޑޭއަށް ވަނީ ރަތް ކާޑު ދައްކާފައެވެ.

މެޗުގެ ފުރަތަމަ ހާފުގައި އެތުލެޓިކޯއިން ވަނީ ލީޑު ނަގާފައެވެ. މިއީ އެޓީމަށް ކުޅެމުންދާ އަޑެމޯލާ ލުކްމަން ކާމިޔާބުކުރި ލަނޑެކެވެ. ނަމަވެސް ދެވަނަ ހާފު ފެށިގެން މާގިނަ އިރުތަކެއް ނުވަނީސް ވިނީޝިއަސް ކާމިޔާބުކުރި ޕެނަލްޓީއަކުން ރެއާލުން ނަތީޖާ ހަމަހަމަކުރިއެވެ. އޭގެ ތިން މިނެޓު ފަހުން ވަލްވާޑޭ ވަނީ ރެއާލަށް ފުރަތަމަ ފަހަރަށް މެޗުގެ ލީޑު ހޯދައިދީފައެވެ.

Ad by Hajj Corporation

އެތުލެޓިކޯގެ ނަހުއެލް މޮލީނާ ފޮނުވާލި ހިތްގައިމު ދުރު ހަމަލާއަކުން މެޗުގެ ނަތީޖާ 2-2 އަށް ބަދަލުކުރި ނަމަވެސް، ވިނީޝިއަސް ވަނީ އިތުރު ލަނޑެއް ޖަހައި އަލުން ރެއާލަށް ކުރި ހޯދައިދީފައެވެ. މެޗުގެ ފަހުކޮޅު އެލެކްސް ބައޭނާއަށް ކުރި ފައުލަކާ ގުޅިގެން ވަލްވާޑޭއަށް ރަތް ކާޑު ދެއްކުމުން ރެއާލުން މެޗު ނިންމާލީ 10 ކުޅުންތެރިންނާއެކުގައެވެ.

މި މޮޅާއެކު ރެއާލް މެޑްރިޑް މިހާރު އޮތީ ތާވަލުގެ އެއްވަނައިގައި އޮތް ބާސެލޯނާއަށްވުރެ ހަތަރު ޕޮއިންޓް ފަހަތުގައެވެ. ބާސެލޯނާ ވަނީ އާދީއްތަ ދުވަހު ކުޅުނު މެޗުގައި ރަޔޯ ވަޔެކާނޯ 1-0 އިން ބަލިކޮށްފައެވެ. އަލްވާރޯ އަރްބެލޯއާގެ އިރުޝާދުގެ ދަށުން ކުޅޭ ރެއާލް ޓީމުން ވަނީ މެޗުގެ ފަހު މިނެޓުތަކުގައި އެތުލެޓިކޯއިން ކުރި ވަރުގަދަ އެޓޭކްތައް ހުށިޔާރުކަމާއެކު ދިފާއުކޮށްފައެވެ.