ސްޕެއިންގެ ގައުމީ ޓީމުގެ ކެޕްޓަން ރޮޑްރީ ހެނާންޑޭޒް، ރެއާލް މެޑްރިޑުން ހުށަހެޅި ބޮޑު މާލީ ފުރުސަތަށް ނޫނެކޭ ބުނުމަށްފަހު ބާސެލޯނާއާ ގުޅުމަށް ނިންމައި، އެކަން ރެއާލްގެ އޮފިޝަލުންނަށް ރަސްމީކޮށް އަންގައިފިއެވެ. ރެއާލް މެޑްރިޑުން ރޮޑްރީ ހޯދުމަށް ފާއިތުވި އެއް ހަފްތާއަށްވުރެ ގިނަދުވަސްވަންދެން މަސައްކަތްތަކެއް ކޮށްފައިވީ ނަމަވެސް، އޭނާ ވަނީ ބާސެލޯނާގެ ހުށަހެޅުމަށް އާނ ބަސް ބުނެފައެވެ.

ރެއާލް މެޑްރިޑްގެ އިސްވެރިންނާއެކު ބޭއްވި މަޝްވަރާތަކުގައި ރޮޑްރީ ވަނީ އެ ކްލަބަށް ވަރަށް ބޮޑަށް އިހުތިރާމް އަދާކޮށްފައެވެ. ނަމަވެސް، ސެންޓިއާގޯ ބާނަބިއުއަށް ބަދަލުވުމާ މެދު އޭނާގެ ފަރާތުން ފުރިހަމަ ޔަގީންކަމެއް ލިބިފައިނުވާތީ، ރެއާލްގެ އޮފިޝަލުން ތިބީ ކޮންމެ ފަދަ ނަތީޖާއަކަށްވެސް ތައްޔާރުވެގެންނެވެ. ރެއާލްގެ ގަބޫލުކުރުމަކީ ކްލަބާ ގުޅޭ ކޮންމެ ކުޅުންތެރިއަކީ އެ ނިންމުމާ މެދު ސައްތަ އިންސައްތަ ޔަގީންކަން އޮތް ކުޅުންތެރިއަކަށް ވާންޖެހޭނެ ކަމަށެވެ.

Ad by Hajj Corporation

ރޮޑްރީ ބާސެލޯނާ އިހުތިޔާރު ކުރި ސަބަބުތަކުގެ ތެރޭގައި އެ ކްލަބުގެ ކުޅުމުގެ ވައްޓަފާޅިއާއި ސްޕެއިން ގައުމީ ޓީމުގައި ހިމެނޭ ބާސެލޯނާގެ 8 ކުޅުންތެރިންނާއެކު އުފެދިފައިވާ ގާތް ގުޅުން ހިމެނެއެވެ. ރެއާލް މެޑްރިޑުން ވަނީ ރޮޑްރީގެ މި ނިންމުމަށް އިހުތިރާމްކޮށް، އޭނާއަށް ކާމިޔާބީއަށް އެދިފައެވެ. އެ ކްލަބުން ދެކޭ ގޮތުގައި ރޮޑްރީއަކީ ހުނަރުވެރި، ލީޑަޝިޕް ސިފަތައް ހުރި މުހިންމު ކުޅުންތެރިއެއް ނަމަވެސް، އޭނާ ނުލިބުމަކީ ބޮޑު ނާކާމިޔާބީއެއްގެ ގޮތުގައި އެ ކްލަބުން ނުދެކެއެވެ.

މި ހާލަތާ ގުޅޭގޮތުން ހޯސޭ މޮރީނިއޯއަށްވެސް މައުލޫމާތު ދެވިފައިވާއިރު، އޭނާ ގަބޫލުކުރާ ގޮތުގައި ރެއާލްގެ މިހާރުގެ ސްކޮޑުގައި މެދުތެރެ ބެލެހެއްޓުމަށް އެކަށީގެންވާ ކުޅުންތެރިން އެބަތިއްބެވެ. އެހެންކަމުން، ރޮޑްރީ ނުލިބުމުން އިތުރު ކުޅުންތެރިއަކު ހޯދުމުގެ ބަދަލުގައި މިހާރު ތިބި ކުޅުންތެރިންނަށް އިތުބާރު ކުރުމަށް ރެއާލުން ވަނީ ނިންމާފައެވެ.

ޓްރާންސްފާގެ އަގު

ބާސެލޯނާއިން ރޮޑްރީ ހޯދުމަށް ގާތްގަނޑަކަށް 60 މިލިއަން ޔޫރޯ (70 މިލިއަން ޑޮލަރު) ޚަރަދު ކުރާނެ ކަމަށް ބެލެވެއެވެ. އަދި އޭނާ ސޮއިކުރާނީ ހަތަރު އަހަރުގެ ކޮންޓްރެކްޓެއްގައެވެ. މި ކޮންޓްރެކްޓްގެ ދަށުން އަހަރަކު ގާތްގަނޑަކަށް 30 މިލިއަން ޔޫރޯ އޭނާއަށް މުސާރައިގެ ގޮތުގައި ލިބޭނެ ކަމަށް ރިޕޯޓްތައް ބުނެއެވެ.

މީގެ ކުރިން ރެއާލް މެޑްރިޑުން މެންޗެސްޓާ ސިޓީއާއެކު ދެ ފަހަރަކު ވާހަކަދެއްކި ނަމަވެސް، އެއީ ހަމައެކަނި ކުޅުންތެރިޔާއާ އެއްބަސްވުމަކަށް އާދެވިއްޖެ ހާލަތެއްގައި ކަންތައް ކުރާނެ ގޮތުގެ މަޝްވަރާތަކެކެވެ. ރަސްމީކޮށް ޓްރާންސްފާ ފީއަކާ މެދު އެއްވެސް މަޝްވަރާއެއް ކުރެވިފައެއް ނުވެއެވެ.