ގދ. ތިނަދޫ ސިޓީގެ ތަރައްޤީއަށްޓަކައި ކުރެވޭ މަސައްކަތްތަކުގައި އައު ޖޯޝަކާއި ދިރުމެއް ގެނުވުމަށްޓަކައި، ކުރިއަށް އޮތް ކައުންސިލް އިންތިޚާބުގައި ތިނަދޫ ސިޓީ ދެކުނު ދާއިރާއަށް ކުރިމަތިލައްވާފައިވާ ޝަހާއުﷲ ޝަމީމަކީ އުއްމީދީ އަދި އެހާމެ ގާބިލު ކެންޑިޑޭޓެކެވެ.

މި އިންތިޚާބުގައި ޝަހާއުﷲ ޚިޔާރު ކުރުން ވެގެންދާނީ ސިޓީގެ ތަރައްގީ އަށް ނެގޭ ''ރަން ޗޮއިސް'' އަކަށްކަން ކަށަވަރުވާ އެތައް ސަބަބުތަކެއް ޝަހާﷲގެ ޚިދުމަތުގެ ސަފުހާތަކުން އެކަނި ވެސް ކަށަވަރުކޮށްދެއެވެ.

Ad by Hajj Corporation

ތަޢާރަފާއި ތަޢުލީމީ ފަސްމަންޒަރު

ޝަހާއުﷲ ޝަމީމަކީ ތިނަދޫ ސިޓީ ދެކުނު ދާއިރާއަށް އުފަން، އެ ދާއިރާގައި އުޅެބޮޑުވި އެ ދާއިރާގެ ދަރިއެކެވެ. އޭނާއަކީ ސަންފާ މަނިކެގެ ސަޢީދުގެ ޚަދީޖާ އާއި ކައިދާފާނުގެ އަލީ ޝަމީމް (ކަތީބު ޝަމީމް) ގެ ދަރިއެކެވެ. ތަޢުލީމީ ޙަޔާތް ގދ. އަތޮޅު ތަޢުލީމީ މަރުކަޒުން ނިންމެވުމަށްފަހު، ވޭތުވެދިޔަ 22 އަހަރު ދުވަހު އޭނާ ވަނީ ސަރުކާރުގެ އެކިއެކި މަޤާމުތަކާއި އަމިއްލަ ކުންފުނިތަކުގައި ވަޒީފާ އަދާކުރައްވައި، މަސައްކަތުގެ ބޮޑު ތަޖުރިބާއެއް ހޯއްދަވާފައެވެ.

ސިޔާސީ އަދި އިޖުތިމާޢީ ޚިދުމަތް

ޝަހާއުﷲގެ ސިޔާސީ ޙަޔާތް ފެށުނީ 2011 ވަނަ އަހަރުއެވެ. ޕީޕީއެމް/ޕީއެންސީގެ ގްރާސްރޫޓުން ފެށިގެން މަސައްކަތް ކުރައްވައި، އޭނާ ވަނީ ޕީޕީއެމް ސްޓިއަރިންގ ކޮމިޓީގެ މެންބަރުކަމާއި، މިހާރު ހިނގަމުންދާ ޕީއެންސީގެ ސްޓިއަރިންގ ކޮމިޓީގެ ރައީސްގެ މަޤާމު ފަދަ ޒިންމާދާރު މަޤާމުތައް ފުރަހައްދަވާފައެވެ.

އިޖުތިމާޢީ ގޮތުން ބަލާއިރު، 2014 އިން ފެށިގެން ތިނަދޫ ސްޕޯޓްސް ކުލަބުގެ އެކްޓިވް މެންބަރެއްގެ ގޮތުގައި އޭނާ ދަނީ މަސައްކަތް ކުރައްވަމުންނެވެ.

ކޯޑިނޭޓަރުކަމާއި، އެސިސްޓެންޓް ޖެނެރަލް ސެކްރެޓަރީކަން ކުރެއްވުމަށްފަހު، މިހާރު އޭނާއަކީ އެ ކުލަބުގެ ޖެނެރަލް ސެކްރެޓަރީއެވެ.

ރަށުގެ ކުޅިވަރު ކުރިއެރުވުމަށާއި، ފުޓުބޯޅަ ތަރައްޤީކޮށް ކޯޗުން ތަމްރީނުކުރުމުގައި އޭނާ ވަނީ ފާހަގަކޮށްލެވޭ މަސައްކަތްތަކެއް ކުރައްވާފައެވެ.

ދިރިއުޅުމުގެ ކާމިޔާބީތައް

ޝަހާއުﷲގެ ދިރިއުޅުމުގައި ލިބުނު އެންމެ ބޮޑު ކާމިޔާބީއަކީ އަމިއްލަ ފައިމައްޗަށް ތެދުވެ، އަމިއްލަ އާމްދަނީއަކުން ކާމިޔާބު އާއިލީ ދިރިއުޅުމެއް ބިނާކުރެވުމެވެ.

އަނތްބަކާއި ދެ ކުދިންނާއެކު އުފާވެރި ދިރިއުޅުމެއް އުޅުއްވަމުންދާއިރު، އޭނާގެ ކާމިޔާބީގެ އެންމެ ބޮޑު ސިއްރަކީ އޭނާގެ އަނބިމީހާގެ ފަރާތުން ލިބޭ ފުރިހަމަ އެއްބާރުލުމާއި ހިތްވަރުކަން އޭނާ ފާހަގަކުރައްވައެވެ. ވަޒީފާގެ މައިދާނުގައި ލިބިފައިވާ ކުރިއެރުންތަކަކީ ވެސް އޭނާގެ އިޚުލާސްތެރި މަސައްކަތުގެ ނަތީޖާއެވެ.

އިންތިޚާބަށް ކުރިމަތިލީ ސަބަބާއި އަމާޒުތައް

ކައުންސިލަށް ކުރިމަތިލުމުގެ އެންމެ ބޮޑު ސަބަބަކީ ރައްޔިތުންނަށް ދޭންޖެހޭ ޚިދުމަތްތައް އެންމެ އެކަށީގެންވާ ގޮތެއްގައި ނުލިބޭކަމުގެ ޝަކުވާ އޮތުމާއި، ކައުންސިލުން ރައްޔިތުންނަށް އިހުމާލުވަމުންދާކަން އިހުސާސްވުމެވެ. ޝަހާއުﷲގެ އަމާޒަކީ ރައްޔިތުންގެ މަޝްވަރާއާއެކު، އިޚުލާސްތެރިކަމާއެކު ރައްޔިތުންނަށް ޚިދުމަތްކުރުމެވެ.

މަޤާމަށް ހޮވިއްޖެނަމަ، އޭނާގެ އެންމެ ފުރަތަމަ އިސްކަމަކީ:

• ދޮރުން ދޮރަށް ހިނގިއިރު ރައްޔިތުން ފާހަގަކުރި ކަންބޮޑުވުންތަކަށް ޙައްލު ހޯދުން.
• ބޯހިޔާވަހިކަމާއި، ޒުވާނުންނަށް ބޭނުންވާ ކަންކަމުގައި މަސައްކަތްކުރުން.
• ސިއްޙީ އަދި ތަޢުލީމީ ދާއިރާގެ ހުރި މައްސަލަތައް ސަރުކާރާ ގުޅިގެން ޙައްލުކުރުން.

ޝަހާއުﷲ އިންތިޚާބު ކުރަންވީ ކީއްވެ؟

ޝަހާއުﷲ އަކީ ރައްޔިތުންގެ ޙައްޤުގައި ވަކާލާތު ކުރެވޭނެ، އިތުބާރު ހިފޭ، އަދި ސަރުކާރާ ގުޅިގެން ދާއިރާއަށް ތަރައްޤީ ގެނެވޭނެ ފަދަ ޤާބިލުކަން ހުރި ފަރާތެކެވެ.

މުޅި ދެކުނު ދާއިރާއަށް ބަލާއިރު، އޭނާއަކީ ޕީއެންސީގެ ފަރާތުން ހުރި ހަމައެކަނި ފިރިހެން ކެންޑިޑޭޓެވެ. ސަރުކާރަށް ނިސްބަތްވާ ކެންޑިޑޭޓަކު ދާއިރާ ތަމްޞީލުކުރުމަކީ ތަރައްޤީގެ މަޝްރޫޢުތައް އަވަސްކުރުމަށް ލިބޭނެ އެންމެ ބޮޑު ފުރުޞަތުކަމުގައި އޭނާ ދެކެއެވެ. ޝަހާއުﷲ ޝަމީމަކީ ތިނަދޫ ސިޓީ ދެކުނު ދާއިރާގެ އުއްމީދީ މުސްތަޤުބަލަށްޓަކައި އެންމެ އެކަށޭނަ ކެންޑިޑޭޓެވެ.