އެމެރިކާގެ ސިފައިން އެއްގަމު މަގުން އީރާނަށް އަރައިގަންނަން އުޅޭނަމަ، އެމީހުން އަންދާލައި، މި ސަރަހައްދުގައި ތިބި އެމެރިކާގެ ބައިވެރިންނަށް ދާއިމީ އަދަބެއް ދިނުމަށް އީރާނުގެ އަސްކަރިއްޔާ އޮތީ ފުރިހަމައަށް ތައްޔާރަށް ކަމަށް އެ ގައުމުން އިންޒާރު ދީފިއެވެ.

އީރާނުގެ މަޖިލީހުގެ ރައީސް މުޙައްމަދު ބާގިރު ގާލީބާފް ދެއްވި ބަޔާނެއްގައި ވިދާޅުވީ، ދުޝްމަނުން ފާޅުގައި މަޝްވަރާ އާއި ވާހަކަދެއްކުމުގެ މެސެޖުތައް ފޮނުވަމުންދާއިރު، ސިއްރިއްޔާތުގައި ރާވަމުންދަނީ އެއްގަމު މަގުން ހަމަލާދިނުމަށް ކަމަށެވެ.

Ad by Hajj Corporation

"އެމެރިކާގެ ސިފައިން އެއްގަމު މަގުން އެރުމަށް އަހަރެމެންގެ ފިރިހެނުން އިންތިޒާރު ކުރަމުންދާކަން އެމެރިކާއަކަށް ނޭނގެއެވެ. އެއީ އެމީހުން އަންދާލައި، މި ސަރަހައްދުގައި ތިބި އެމީހުންގެ ބައިވެރިންނަށް ދާއިމީ އަދަބެއް ދިނުމަށެވެ،" ގާލީބާފް ވިދާޅުވިއެވެ.

މި ވަރުގަދަ އިންޒާރު އީރާނުން ދީފައިވަނީ މާރިޗު 27 އާއި 28 އާ ދެމެދު އެމެރިކާގެ ސެންޓްކޮމްގެ ސަރަހައްދަށް "އަޔަން ފިސްޓް" ގެ ނަމުން މަޝްހޫރުވެފައިވާ ޔޫ.އެސް.އެސް ޓްރިޕޮލީ (LHA 7) އައުމާ ގުޅިގެންނެވެ. މި މަނަވަރަކީ އެއްގަމާއި ކަނޑުމަގުން ހަމަލާދިނުމަށް ޚާއްސަ 31 ވަނަ މެރިން އެކްސްޕެޑިޝަނަރީ ޔުނިޓް ގެ ގާތްގަނޑަކަށް 3,500 މެރިން ސިފައިންނާއި ފަޅުވެރިން އުފުލާ މަނަވަރެކެވެ. ސެޓެލައިޓް ފޮޓޯތަކުން ފެންނަ ގޮތުގައި މި މަނަވަރުގެ ޑެކް ފުރިފައިވަނީ އެފް-35ބީ ލައިޓްނިންގް II ސްޓެލްތު ޖެޓްތަކާއި، އޮސްޕްރޭ ޓްރާންސްޕޯޓް މަތިންދާބޯޓުތަކުގެ އިތުރުން ސީހޯކް ހެލިކޮޕްޓަރުތަކުންނެވެ.

މި ނުތަނަވަސްކަމުގެ ތެރޭގައި، ބަހްރޭނާއި ޔޫ.އޭ.އީ ގެ ބޮޑެތި އެލުމިނިއަމް ކާރުހާނާތަކަށް ދިން ޑްރޯން ހަމަލާތަކުގެ ޒިންމާ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ވަނީ އުފުލާފައެވެ. އީރާނުން ބުނަމުންދަނީ ގަތަރުގައި ހުރި އެމެރިކާގެ އަސްކަރީ ބޭސްތަކުން އީރާނަށް އެއްވެސް ހަމަލާއެއް ދީފިނަމަ، އޭގެ ނޭދެވޭ އަސަރު މުޅި ސަރަހައްދަށް ކުރާނެ ކަމަށެވެ.

މި ހާދިސާތަކާ ގުޅިގެން މެދުއިރުމަތީގެ މަސްރަހު މިހާރު ވަނީ ނުހަނު ބޮޑަށް ހޫނުވެ، ބޮޑު ހަނގުރާމައެއްގެ ބިރުވެރިކަން އުފެދިފައެވެ.