މާލެ ސިޓީގެ ކޮންމެ ރައްޔިތަކަށް ކޮންމެ އާއިލާއަކަށް ކޮންމެ ގޭބީސީއަކަށް ދެން ކުރިއަށް އޮތީ އުފާވެރި ދުވަސްތަކެއް ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މާލެ ސިޓީގެ މޭޔަރު ކަމަށް ވާދަކުރައްވާ މޫސާ އަލީ ޖަލީލް ވިދާޅުވެއްޖެއެވެ.

ރޭ އޮތް ކޮންގްރެސް ޕާޓީގެ ހަރުގެ ޖަލްސާގައި ވާހަކަ ދައްކަވަމުން ޖަލީލް ވިދާޅުވީ، މާލޭ ސިޓީގެ މޭޔަރުގެ ޒިންމާއަކީ ހަމައެކަނި މާލޭގެ ރައްޔިތުން ނޫންކަމަށާއި، މާލޭގެ ރައްޔިތުންނަށްޓަކާ މޭޔަރުގެ ވިސްނުމާ އަދި ހިދުމަތް ވަރަށް ބޮޑަށް ތަނަވަސް ކުރަންޖެހޭނެ ކަމަށެވެ.

Ad by Hajj Corporation

އަދި މާލެ ސިޓީއަށް ޒިޔާރަތްކުރާ ބޭރުގެ ފަރާތްތަކަށް މާލެއަކީ ނަމޫނާ ސިޓީއެއްގެ ގޮތުގައި ދެއްކުމަކީ މާލޭ ސިޓީގެ މޭޔަރު ސަމާލުކަން ދޭންޖެހޭނެ ކަމެއްކަމަށާއި، އެއީ ފަތުރުވެރިން ނުވަތަ ދަތުރުވެރިން ކަމުގައިވީނަމަވެސް އެމީހަކު މާލެއިން ފުރައިގެން ދާންވާނީ މާލެ އާއި މާލޭގައި ދިރިއުޅޭ ރައްޔިތުންނާމެދު ހިތްހަމަ ޖެހިގެން ކަމަށް ޖަލީލް ވިދާޅުވިއެވެ.

"ފަހަރެއްގައި ވެސް އަޅުގަނޑަކީ ކަންނުވެ ނަންވި މީހެއް ނޫން. އޭގެ ބަދަލުގައި އަބަދުވެސް އަޅުގަނޑަކީ ދިވެހި ޤައުމާއި ދިވެހި ރައްޔިތުންގެ އަމާން ކަމާއި ސަލާމަތަށްޓަކައި ކުރިއަށްދިޔަ އަމަލީ ޚިދުމަތްތެރިއެއް," މޫސާ އަލީ ޖަލީލް

މީގެ އިތުރުންވެސް މާލެގައި މިހާރުން މިހާރަށް ކުރަންޖެހޭ އެތަށް ކަމެއް އެބަހުރިކަން ފާހަގަކުރައްވާ ޖަލީލް އިތުރަށް ވިދާޅުވީ، ޒުވާނުން މުނިފޫހިފިލުވާނެ ފުރުސަތުތަށް އިތުރުކުރުމާއި، އެކިކަހަލަ ކުޅިވަރުތައް ކުޅުމަށް ފެސިލިޓީތަށް އިތުރުކުރުމާއި އަދި ޒުވާނުން ބޭނުންވަނީ ކޮންކަމެއްތޯ ބަލާ އަދި ޒުވާނުން ކަންކަމުގައި ބައިވެރިކުރަން ޖެހޭ ކަމަށެވެ.

އަދި ޖަލީލް ހުންނެވީ މާލެއާ މެދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ބިޔަ ތަސައްވުރު ހަޤީޤަތަކަށް ހެއްދެވުމަށް ނުގުނޑާނެ ފަދަ ވަރުގަދަ އަޒުމެއްގައި ކަމަށާއި، މާލެ ސިޓީގެ ކޮންމެ ރައްޔިތަކަށް ކޮންމެ އާއިލާއަކަށް ކޮންމެ ގޭބީސީއަކަށް ދެން ކުރިއަށް އޮތީ އުފާވެރި ދުވަސްތަކެއްކަމަށް ވެސް ޖަލީލް ވިދާލުވިއެވެ.