ޔުއެފާ ނޭޝަންސް ލީގުގައި ރޭ ކުޅުނު މެޗުތައް ގްރީސް އަދި ފްރާންސް އިން ކާމިޔާބުކުރިއިރު، އިޓަލީގެ މެޗު އެއްވަރު ވެއްޖެއެވެ.

ބުޑަޕެސްޓުގައި ރޭ ކުޅުނީ އެ މުބާރާތުގެ ލީގު އޭގެ، ގްރޫޕު ދޭއްގައި ފްރާންސާއި އިސްރާއީލުގެ މެޗު އަދި މިލާނުގައި ކުޅުނު އިޓަލީއާއި ބެލްޖިއަމްގެ މެޗެވެ. އަދި ލަންޑަންގައި ރޭ ކުޅުނީ އެ މުބާރާތުގެ ލީގު ބީގެ، ގްރޫޕު ދޭއްގައި އިނގިރޭސިންނާއި ބްލެޖިއަމްގެ މެޗެވެ.

އެގޮތުން ގްރޫޕު އޭގައި ކުޅުނު ފްރާންސާއި އިސްރާއީލުގެ މެޗު، ފްރާންސުން ކާމިޔާބު ކުރީ 4 ލަނޑު އެއް ލަނޑުންނެވެ. މިއީ ފްރާންސްގެ ކެޕްޓަން، އެންޓޫނިއާ ގްރީޒްމަން ގައުމީ ޓީމުން ރިޓަޔާ ވީފަހުން ކުޅުނު ފުރަތަމަ މެޗެވެ. އެ މެޗުގެ ހަ ވަނަ މިނެޓުގައި ފްރާންސުން އެ ޓީމުގެ ފުރަތަމަ ލަނޑު ކާމިޔާބު ކުރިއިރު، އެ ލަނޑު އެ ޓީމަށް ކާމިޔާބުކޮށްދިނީ ރެއާލް މެޑްރިޑަށް ކުޅޭ އެޑޮއާޑޯ ކަމަވިންގާއެވެ. މިއީ ކަމަވިންގާ، ގައުމީ ޓީމަށް ޖަހައިދިން ދެވަނަ ގޯލެވެ.

ފްރާންސުން ގޯލެއް ޖަހައިފައިވަނީކޮށް، އިސްރާއީލުގެ އޮމްރީ ގަންޑެލްމަން ބޮލުން ޖަހައި، މެޗު އެއްވަރުކުރިއެވެ. އެ ގޯލު އޭނާ ޖެހީ މެޗުގެ 24 ވަނަ މިނެޓުގައެވެ.

އެހެން ނަމަވެސް، ކުޅުން ވަރުގަދަކޮށް ފްރާންސުން އިތުރު ތިން ގޯލު ޖެހިއެވެ. އެގޮތުން މެޗުގެ 29 ވަނަ މިނެޓުގައި ފްރާންސުގެ މިޑްފީލްޑަރު ކްރިސްޓޮފާ އެންކުންކޫ ލަނޑެއް ޖަހައި، ފްރާންސަށް އަލުން ލީޑު ނަގައި ދިންިއިރު، ފަހު ދެ ގޯލު ކާމިޔާބުކޮށްދިނީ މަޓެއޯ ގެންޑޫޒީ އަދި އަރަމުން އަންނަ ތަރި ބްރެޑްލީ ބާކޯލާއެވެ.

ހަމަ އެ ގްރޫޕުގައި ދެން ކުޅުނު އިޓަލީ އަދި ބެލްޖިއަމްގެ މެޗު ނިމުނީ ދެ ލަނޑު، ދެ ލަނޑުން އެއްވަރު ވެގެންނެވެ. އެ މެޗު ފެށިގެން މިނެޓެއް ނުވަނީސް، އިޓަލީން ލީޑު ނެގިއިރު، އެ ލަނޑު އިޓަލީގެ ޓީމަށް ޖަހައިދިނީ އަންދްރެއާ ކަމްބިއާސޯއެވެ. އަދި މެޗުގެ ދެވަނަ ލަނޑު، މެޗުގެ 24 ވަނަ މިނެޓުގައި ޖަހައި ލީޑު އީޓަލީން ފުޅާކުރިއިރު، އެ ލަނޑު އެ ޓީމަށް ޖަހައިދިނީ މަޓެއޯ ރެޓެގީއެވެ.

އެހެން ނަމަވެސް މެޗުގެ ފުރަތަމަ ހާފުގެ ކުޅުން ނިމެން އުޅެނިކޮށް، އިޓަލީގެ ލޮރެންޒޯ ޕެލެގްރީނީ އަށް ރަތް ކާޑެއް ދެއްކުމާ ގުޅިގެން އޭގެ ފައިދާ ބެލްޖިއަމް އިން ހިފައި، މެޗު އަނބުރާލަން ގިނަ މަސައްކަތްތަކެއް ކުރިއެވެ. އެގޮތުން އޭގެ ދެ މިނެޓު ފަހުން، ބެލްޖިއަމް އިން އެ ޓީމުގެ ފުރަތަމަ ލަނޑު ޖެހިއެވެ. އެ ލަނޑު އެ ޓީމަށް ކާމިޔާބުކޮށްދިނީ މެކްސިމް ޑި ކުއިޕާ އެވެ. ދެ ވަނަ ހާފުގައި ބެލްޖިއަމަށް އެއްވަރުކޮށްދިން ލަނޑު ޖެހީ އާސެނަލްއަށް ކުޅޭ ޓްރޮސާޑް އެވެ.

މީގެ އިތުރުން، ރޭ ލީގު ބީގެ ގްރީސް އާއި އިނގިރޭސިން ކުޅުނު މެޗުން، ގްރީސް އިން ވަނީ ރަސްމީ މެޗެއްގައި ފުރަތަމަ ފަހަރަށް އިނގިރޭސީން ބަލިކޮށްފައެޗެ. އެގޮތުން ރޭ ލަންޑަނުގެ ވެމްބްލީގައި ކުޅުނު އެ މެޗުން ބެލްޖިއަމް މޮޅުވީ 2 ލަނޑު އެއް ލަނޑުންނެވެ.

އެ މެޗުގެ ލަނޑުތައް ދެވަނަ ހާފުގައި ފެނުނުއިރު، މެޗުގެ ފުރަތަމަ ލަނޑު ޖެހީ ގްރީސްގެ ވަންގެލިސް ޕްވްލީޑީސްއެވެ. އެ ނަތީޖާ ހަމަހަމަ ކުރުމުގެ ފުރުސަތު އިނގިރޭސީންނަށް ލިބުނީ މެޗުގެ 88 ވަނަ މިނެޓުގައިެވެ. އެގޮތުން އެ ލަނޑު އެ ޓީމަށް ޖަހައިދިނީ ރެއާލް މެޑްރިޑްއަށް ކުޅޭ ހުނަރުވެރި ފޯވާޑް ޖޫޑް ބެލިންގްހަމްއެވެ. އެ ލަނޑު އޭނާ ޖެހީ ބަދަލު ކުޅުންތެރިއެއްގެ ގޮތުގައި ކުޅެން އެރި ޑޮމިނިކް ސޮލާންކޭ ދިން ބޯޅައަކުންނެވެ.

އެހެން ނަމަވެސ،ް މެޗުގެ އިތުރު ވަގުތުގެ ތިން ވަނަ މިނެޓުގައި ގްރީސްގެ ޕަވްލީޑީސް ވަނީ އިތުރު ގޯލެއް ޖަހައި، އެ ޓީމަށް ތާރީހީ މޮޅެއް ހޯދައިދީފަ އެވެ.

މި ނަތީޖާ ތަކާއެކު، އެ މުބާރާތުގެ ލީގު އޭގެ ދެވަނަ ގްރޫޕުގައި 7 ޕޮއިންޓާއެކު އިޓަލީ އެއްވަނައިގައި އޮތް އިރު، ދެވަނައިގައި ފްރާންސް އޮތީ 6 ޕޮއިންޓު ލިބިގެންނެވެ. ތިންވަނައިގައި އޮތް ބެލްޖިއަމްއަށް ހަތަރު ޕޮއިންޓް ލިބިފައިވާއިރު، ގްރޫޕުގެ ފުލުގައި އިސްރާއީލް އޮތީ އެއްވެސް މެޗަކުން މޮޅުނުވެ، ސުން ޕޮއިންޓް ލިބިގެންނެވެ.

އަދި ލީގު ބީގެ ގްރޫޕު ދޭއްގެ އެއްވަނައިގައި ކުޅުނު ހުރިހާ މެޗަކުން މޮޅުވެ ގްރީސް އޮތް އިރު، ދެވަނައިގައި އިނގިރޭސީން އޮތީ 6 ޕޮއިންޓާއެކުއެވެ.

ނޭޝަންސް ލީގުގައި ޖުމްލަ ހަތަރު ލީގު އޮންނަ އިރު، އޭގެ ތެރެއިން ލީގު ޑީ ފިޔަވައި ހުރިހާ ލީގެއްގައި ވެސް ހަތަރު ގްރޫޕު އޮވެއެވެ. ލީގު ޑީގައި އޮންނަނީ ދެ ގްރޫޕެވެ.