ޔުއެފާ ނޭޝަންސް ލީގުގައި ރޭ ކުޅުނު މެޗުތަކުން ޖަރުމަނު، ތުރުކީ، ޝެޒިއާ އަދި ޔޫކްރެއިން މޮޅުވެއްޖެއެވެ.

އެ މުބާރާތުގެ ލީގު އޭގެ ތިން ވަނަ ގްރޫޕުގެ ޖަރުމަނާއި ބޮސްނިއާ ކުޅުނު މެޗު، ޖަރުމަނު ކާމިޔާބު ކުރީ 2 ލަނޑު އެއް ލަނޑުންނެވެ. އެ މެޗުގެ ފުރަތަމަ ހާފުގައި ޖަރުމަނުން ވަނީ ދެ ލަނޑު ޖަހައިފައެވެ.

ބޮސްނިއާގެ ބިލިނޯ ޕޮލްހެ ސްޓޭޑިއަމްގައި ކުޅުނު އެ މެޗުގައި ޖަރުމަނުގެ ދެ ލަނޑު ވެސް ޖަހައިދިނީ ޑެނިޒް އުންޑަވްއެވެ. އޭނާ އެ ލަނޑުތައް ޖަހައިދިނީ މެޗުގެ 30 ވަނަ މިނެޓާއި 36 ވަނަ މިނެޓުގައެވެ. ބޮސްނިއާ އިން ޖެހި ހަމައެކަނި ލަނޑު އެ ޓީމުން ޖެހީ މެޗުގެ 70 ވަނަ މިނެޓުގައެވެ. އެ ލަނޑު ޖަހައިދިނީ ހުނަރުވެރި ފޯވާޑް އެޑިން ޒެކޯއެވެ.

އެ ނަތީޖާއާއެކު ތިން މެޗުން ލިބުނު ހަތް ޕޮއިންޓާއެކު ޖަރުމަނު އޮތީ ގްރޫޕުގެ އެއްވަނައިގައެވެ. ގްރޫޕުގެ ފުލުގައި ބޮސްނިއާ އޮތީ އެއް ޕޮއިންޓް ލިބިގެންނެވެ.

އެ މުބާރާތުގެ ލީގު ބީގެ އެއްވަނަ ގްރޫޕުގައި ރޭ ކުޅުނީ ޔޫކްރެއިން އާއި ޖޯޖިއާގެ މެޗެވެ. އެ މެޗުން ޔޫކްރެއިން މޮޅުވީ އެއް ލަނޑު ސުން ލަނޑުންނެވެ. އެ މެޗުގައި ޔޫކްރެއިން އިން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ އިނގިރޭސި ކްލަބް ޗެލްސީއަށް ކުޅޭ ހުނަރުވެރި ފޯވާޑް، މުޑްރީކްއެވެ.

އަދި ހަމަ އެ ގްރޫޕުގައި ދެން ކުޅުނު ޗެޒިއާ އަދި އަލްބޭނިއާގެ މެޗު، ޗެޒިއާއިން ކާމިޔާބު ކުރީ ދެ ލަނޑު ސުން ލަނޑުންނެވެ. އެ މެޗުގައި ޗެޒިޔާގެ ދެ ލަނޑު ވެސް ޖަހައިދިނީ ތޯމަސް ޝޯރީއެވެ. އޭނާ އެ ލަނޑުތައް ޖަހައިދިނީ އެ މެޗުގެ ތިން ވަނަ މިނެޓާއި 63 ވަނަ މިނެޓުގައެވެ.

އެ ނަތީޖާތަކާ އެކު އެ ގްރޫޕުގެ އެއްވަނައިގައި ރޭ ބަލިވި ނަމަވެސް، ޖޯޖިޔާ އޮތީ ކުޅުނު ތިން މެޗުން ހަ ޕޮއިންޓް ހޯދައިގެންނެވެ. ދެވަނައިގައި އޮތް ޗެޒިއާ އަށް ވެސް ހަ ޕޮއިންޓް ލިބޭއިރު، ޖޯޖިޔާ އެއްވަނައިގައި އޮތީ ބައިކޮޅަށް ވަތް ގޯލުގެ އަދަދު މަދުވުމުގެ ސަބަބުން، ގޯލު ޑިފަރެންސްގެ ސަބަބުންނެވެ. އެ ގްރޫޕުގެ ތިންވަނައިގައި އަލްބޭނީއާ އޮތް އިރު، ހަތަރު ވަނައިގައި ޔޫކްރެއިން ވެސް އޮތީ ތިން ޕޮއިންޓް ލިބިގެންނެވެ.

މީގެ އިތުރުން އެ މުބާރާތުގެ ލީގު ބީގެ ގްރޫޕް ހަތަރެއްގައި ތުރުކީ އާއި މޮންޓެނެގްރޯ ވާދަ ކުރި މެޗުން ތުރުކީ މޮޅުވީ އެއް ލަނޑު ސުން ލަނޑުންނެވެ. އެ މެޗުގައި ފެނުނު ހަމައެކަނި ގޯލު ޖެހީ ތުރުކީގެ އިރްފާން ކަވޭސީއެވެ. އޭނާ އެ ގޯލު ޖެހީ އެ މެޗުގެ 69 ވަނަ މިނެޓުގައެވެ.

އެ ނަތީޖާތަކާއެކު ލީގު ބީގެ ގްރޫޕު ހަތަރެއްގައި ތުރުކީ އޮތީ، ކުޅުން ތިން މެޗުން ހަތް ޕޮއިންޓް ހޯދައިގެން އެއްވަނައިގައެވެ. އެ ގްރޫޕުގެ ދެވަނައިގައި ވޭލްސް އޮތް އިރު، ތިން ވަނައިގައި އައިސް ލޭންޑް އަދި ހަތަރުވަނައިގައި މޮންޓެނެގްރޯ އޮތީ އެއްވެސް ޕޮއިންޓެއް ނުލިބިއެވެ.