ޔުއެފާ ނޭޝަންސް ލީގުގައި ރޭ ނެދަލޭންޑްސް އާއި ހަންގޭރީ ކުޅުނު މެޗު އެއްވަރު ވެއްޖެއެވެ.

ރޭ ހަންގޭރީގެ ބުޑަޕެސްޓުގައި ކުޅުނު މެޗު ނިމުނީ އެއް ލަނޑު، އެއް ލަނޑުން އެއްވަރު ވެގެންނެވެ. އެ މެޗުގައި އެންމެ ފުރަތަމަ ލަނޑު ޖެހީ ހަންގޭރީންނެވެ. އެ ލަނޑު އެ ޓީމަށް ޖަހައިދިނީ ރޮލަންޑް ސަލާއިއެވެ.

އާދައިގެ ކުޅުމެއް ފެނުނު އެ މެޗުގައި އެންމެ ޚާއްސަ ކަމަކަށް ހިނގީ، ނެދަލޭންޑްސްގެ ކެޕްޓަން އަދި ލިވާޕޫލުގެ ހުނަރުވެރި ޑިފެންޑަރު، ވެން ޑައިކަށް ރަތް ކާޑު ދެއްކުމެވެ. އެގޮތުން މެޗުގެ 79 ވަނަ މިނެޓުގައި އޭނާއަށް ރަތް ކާޑު ދެއްކީ، ދެ މިނެޓުގެ ތެރޭގައި ކުރި ދެ ފައުލަކާ ގުޅިގެންނެވެ. އެގޮތުން މެޗުގެ 76 ވަނަ މިނެޓުގައި ރެފްރީގެ ނިންމުމަކާ ދެކޮޅު ހެދުމުގެ ސަބަބުން ވެން ޑައިކަށް ފުރަތަމަ ރީނދޫ ކާޑު ދެއްކިއިރު، ދެވަނަ ރީދޫ ކާނޑާއެކު ރަތް ކާޑު ދެއްކީ މެޗުގެ 79 ވަނަ މިނެޓުގައެވެ.

އެހެން ނަމަވެސް، ނެދަލޭންޑްސް އިން މެޗުގެ 83 ވަނަ މިނެޓުގައި ކޯޑީ ގަކްޕޯ ނެގި ހީލޭ ޖެހުމެއް، ބޮލުން ޖަހައިގެން ޑެންޒެލް ޑަމްފްރައިސް ނެދަލޭންޑްސްއަށް، އެ ޓީމުގެ ގޯލު ކާމިޔާބުކޮށްދިނެވެ. އެ މެޗު ނިމުނީ އެ ގޮތުގައެވެ.

އެއާއެކު، އެ މުބާރާތުގައި ކުޅުނު ތިން މެޗުން 5 ޕޮއިންޓު ހޯދައިގެން ނެދަލޭންޑްސް އޮތީ އެ ލީގުގެ، ގްރޫޕު ތިނެއްގެ ދެ ވަނައިގައެވެ. ހަންގޭރީ އޮތީ ނެދަލޭންޑަށް ވުރެ ތިން ޕޮއިންޓް މަދުން ލިބިގެން، އެ ގްރޫޕުގެ ތިން ވަނައިގައެވެ. އެއް ވަނައިގައި އޮތީ ރޭ ބޮސްނިއާ އަތުން މޮޅުވި ޖަރުމަނެވެ. ޖަރުމަނަށް ވަނީ ކުޅުނު ތިން މެޗުން 7 ޕޮއިންޓް ލިބިފައެވެ.