ޔުއެފާ ނޭޝަންސް ލީގުގައި ރޭ ޕޮލެންޑާ ދެކޮޅަށް ކުޅުނު މެޗުން ޕޯޗުގަލް މޮޅުވެއްޖެއެވެ. އެ މެޗުގައި ވެސް އެ ޓީމުގެ ކެޕްޓަން އަދި އުމުރުން 39 އަހަރުގެ ކްރިސްޓިއާނޯ ރޮނާލްޑޯ ވަނީ ގޯލެއް ޖަހައިފައެވެ.

އެގޮތުން ރޭ އެ މުބާރާތުގެ ލީގު އޭގެ ގުރޫޕް އެކެއްގައި ޕޯޗުގަލް ކުޅުނު މެޗުން، ޕޯޗުގަލް މޮޅުވީ ތިން ލަނޑު، އެއް ލަނޑުންނެވެ. އެ މެޗުގައި އެންމެ ފުރަތަމަ ގޯލު ޖެހީ ވެސް ޕޯޗުގަލްއިންނެވެ. އެގޮތުން މެޗުގެ 26 ވަނަ މިނެޓުގައި ބެނާޑޯ ސިލްވާ ގޯލެއް ޖެހިއިރު، ދެވަނަ ލަނޑު މެޗުގެ 37 ވަނަ މިނެޓުގައި ޖެހީ ރޮނާލްޑޯއެވެ.

ރޭގެ މެޗުގައި ރޮނާލްޑޯ ޖެހީ، އެ މުބާރާތުގެ ތިން ވަނަ ގޯލެވެ. އޭނާ ވަނީ އެ މުބާރާތުގައި ކުޅުނު ކޮންމެ މެޗެއްގައި ވެސް ގޯލެއް ޖަހައިފައެވެ.

އެ މެޗުގެ ތިން ވަނަ ލަނޑު ޖެހީ ޕޮލެންޑުންނެވެ. އެގޮތުން މެޗުގެ 78 ވަނަ މިނެޓުގައި ޕޮލެންޑުގެ ޕިއޯ ޒެލިންސްކީ ގޯލު ޖެހިއިރު، ޕޯޗުގަލްގެ ތިން ވަނަ ލަނޑު ވަނީ ބައިކޮޅަށެވެ. އެ ލަނޑު ވަނީ ޕޮލެންޑުގެ ޖެން ބައެނަރެކްގެ ގައިގައި ޖެހިފައެވެ.

އެ ނަތީޖާތަކާ އެކު އެ ގްރޫޕުގެ އެއްވަނައިގައި ޕޯޗުގަލް އޮތޯ ކުޅުނު ތިން މެޗުން ވެސް މޮޅުވެގެންނެވެ. ދެވަނައިގައި އޮތް ކްރޯއޭޝިއާ އެއް މެޗުން ބަލިވެފައިވާއިރު، ތިން ވަނައިގައި އޮތް ޕޮލެންޑް ވަނީ ދެ މެޗުން ބަލިވެފައެވެ. އަދި އެންމެ ފުލުގައި ސްކޮޓްލޭންޑް އޮތީ އެއްވެސް މެޗަކުން މޮޅު ނުވެއެވެ.