އިސްރާއީލުން ޣައްޒާއަށް ދިން ޑްރޯން ހަމަލާއެއްގައި އަލްޖަޒީރާގެ ނޫސްވެރިޔާ މުހައްމަދު ވިޝާހް ޝަހީދުވެއްޖެއެވެ.

އަލްޖަޒީރާ މުބާޝަރުގެ ނޫސްވެރިއެއް ކަމަށްވާ ވިޝާހް ޝަހީދުކޮށްލާފައިވަނީ ޣައްޒާގެ ހުޅަނގު އައްސޭރިފަށުގައި އޮންނަ އަލް ރާޝިދު މަގުގައި އޭނާ ދަތުރު ކުރަމުން ދިޔަ ކާރަކަށް ޑްރޯން ހަމަލާއެއް ދީގެންނެވެ.

އަލްޖަޒީރާ އިން މައުލޫމާތު ލިބިފައިވާ ގޮތުގައި ވައިގެ ހަމަލާގެ ސަބަބުން ކާރުގައި ވަނީ އަލިފާން ރޯވެ އަނދައި ހުލިވެފައިވެއެވެ.

2023 ވަނަ އަހަރުގެ އޮކްޓޫބަރު މަހުން ފެށިގެން ޣައްޒާގައި ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ އުދުވާންތަކުގައި ޣައްޒާގެ ނޫސްވެރިންނަށް ދަނީ ޓާގެޓެޑް ހަމަލާތައް ދެމުންނެވެ.

ޣައްޒާގެ ސަރުކާރުގެ މީޑިއާ އޮފީހުން ބުނީ އިސްރާއީލުން ޣައްޒާއަށް ދިން ހަމަލާތަކުގައި މިހާތަނަށް 262 ނޫސްވެރިން ޝަހީދުވެފައިވާ ކަމަށެވެ.

Ad by Hajj Corporation