ދެ ފަހަރެއްގެ މަތިން ހޮޓެލް ބުކިން ހެދުމަށްފަހު ފޭކް ސްލިޕެއް ފޮނުވައި އަދި އޭގެ ފަހުން ބުކިން ކެންސަލް ކުރުމަށްފަހު ރިފަންޑު ހޯދުމަށް މަސައްކަތްކުރި މައްސަލައެއްގައި މީހަކު ހައްޔަރުކޮށްފިއެވެ.

މި މައްސަލައިގައި ހައްޔަރުކުރީ ނ. ވެލިދޫ، އިހާޒް، މުހައްމަދު އަނޫފްއެވެ.

އުމުރުން 25 އަހަރުގެ އެ ޒުވާނާއަށް ކުރަނީ މަކަރާ ހީލަތް އަދި ސައްހަ ލިޔުމަށް ބަދަލު ގެނައުމުގެ ތުހުމަތެވެ.

މުހައްމަދު އަނޫފްގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 15 ދުވަހަށް ބަންދުކުރަން ވަނީ އަމުރުކޮށްފައެވެ.

މުހައްމަދު އަނޫފް ހޮޓެލް ބުކިން ހެއްދުމަށްފަހު ފޭކް ސްލިޕެއް ފޮނުވާ ކަމަށާއި އަދި އޭގެ ފަހުން ބުކިން ކެންސަލް ކުރުމަށްފަހު ރިފަންޑް ހޯދުމަށް އެދިފައިވާ ކަމަށް މިމައްސަލަ ބަލާ އައިއޯ ވަނީ ފާހަގަކޮށްފައެވެ.

އެ ގޮތުން ނަގުފު ފައިސާއިން ރިފަންޑުގެ ފައިސާ ބަލައި ހޮޓަލުގެ އޮފީހަށް ދިޔައީ މުހައްމަދު އަނޫފް ކަމަށް އައިއޯ ބުނެފައިވެއެވެ.

އައިއޯ ބުނީ މުހައްމަދު އަނޫފް މީގެ ކުރިންވެސް މިފަދަ ކަމެއް ތަކުރާރުކޮށްފައިވާ ކަމަށާއި އެ ފަހަރު ބުކިން ހެއްދުމަށްފަހު ފައިސާ ފޮނުވުމަށް އެދި ފޮނުވާފައިވަނީ އަނޫފްގެ އެކައުންޓް ނަންބަރު ކަމަށެވެ.

Ad by Hajj Corporation