ޖަރުމަނު ބުންޑެސްލީގާގައި ރޭ ކުޅުނު މެޗުގައި ސެއިންޓް ޕައުލީގެ މައްޗަށް 5-0 ގެ ބޮޑު މޮޅެއް ހޯދައި، ބަޔާން މިއުނިކުން ލީގު ތަށި ދިފާއުކުރުމާ ގާތަށް ޖެހިލައިފިއެވެ. މި މޮޅާއެކު ވިންސެންޓް ކޮމްޕެނީގެ ޓީމަށް މިހާރު ލީގު ކަށަވަރުކުރުމަށް ބޭނުންވަނީ ބާކީ އޮތް ފަސް މެޗުން އެންމެ ހަތަރު ޕޮއިންޓެވެ.

މި މެޗުގައި ބަޔާނުން ޖެހި ލަނޑުތަކާއެކު އެ ޓީމުން ވަނީ ބުންޑެސްލީގާގެ ތާރީޚުގައި އާ ރެކޯޑެއްވެސް ގާއިމްކޮށްފައެވެ. އެގޮތުން މި ސީޒަނުގައި އެ ޓީމުން ޖެހި ލަނޑުގެ އަދަދު 105 އަށް އަރާފައިވާއިރު، މިއީ 1971-72 ވަނަ އަހަރުގެ ސީޒަނުގައި އެ ޓީމުން ގާއިމްކުރި 101 ލަނޑުގެ ރެކޯޑު މުގުރާލި ފަހަރެކެވެ. މިހާރު ބަޔާން އޮތީ ތާވަލުގެ އެއްވަނައިގައި 12 ޕޮއިންޓުގެ ލީޑަކާއެކުގައެވެ.

Ad by Hajj Corporation

މިލާންޓޯ ސްޓޭޑިއަމްގައި ކުޅުނު މި މެޗުގެ ނުވަވަނަ މިނެޓުގައި ޖަމާލް މުސިއާލާ ވަނީ ބަޔާނަށް ލީޑު ނަގައިދީފައެވެ. މިއީ ކޮންރަޑް ލައިމާ ނަގައިދިން ހުރަހަކުން އޭނާ ކާމިޔާބުކުރި ލަނޑެކެވެ. މެޗުގެ ފުރަތަމަ ހާފު މި ނަތީޖާގައި އޮވެގެން ނިމުނު ނަމަވެސް، ދެވަނަ ހާފު ފެށިގެން ބަޔާނުން ވަނީ ކުޑަ ވަގުތުކޮޅެއްގެ ތެރޭގައި އިތުރު ދެ ލަނޑު ޖަހާފައެވެ.

މެޗުގެ 53 ވަނަ މިނެޓުގައި ލިއޯން ގޮރެޓްޒްކާ ބަޔާންގެ ދެވަނަ ލަނޑު ޖެހިއިރު، އޭގެ 75 ސިކުންތު ފަހުން އޭނާ ތަނަވަސްކޮށްދިން ފުރުސަތަކުން މައިކަލް އޮލީސޭ ވަނީ ތިންވަނަ ލަނޑު ކާމިޔާބުކޮށްފައެވެ. ހަތަރުވަނަ ލަނޑު 65 ވަނަ މިނެޓުގައި މުސިއާލާގެ އެހީތެރިކަމާއެކު ނިކޮލަސް ޖެކްސަން ކާމިޔާބުކުރިއިރު، ފަސްވަނަ ލަނޑު މެޗު ނިމެން ދެ މިނެޓަށް ވެފައި ވަނިކޮށް ޖެކްސަން ދިން ބޯޅައަކުން ޖެހީ ރަފައެލް ގަރޭރޯއެވެ.

ތަފާސްހިސާބުތަކަށް ބަލާއިރު، ބަޔާނުން ވަނީ މުޅި މެޗު ކޮންޓްރޯލްކޮށް 77.1 އިންސައްތަ ބޯޅަ ހިފަހައްޓާފައެވެ. އަދި އެ ޓީމުން ވަނީ އިދިކޮޅު ގޯލަށް 20 ހަމަލާ ފޮނުވާލާފައެވެ. މިއީ ސެއިންޓް ޕައުލީއާ ދެކޮޅަށް ބަޔާނުން ކުޅުނު ފަހު 12 މެޗުގެ ތެރެއިން އެ ޓީމު މޮޅުވި 11 ވަނަ މެޗެވެ.

މި މެޗުގައި މުސިއާލާ، ޖެކްސަން އަދި ގޮރެޓްޒްކާ ވަނީ ކޮންމެ ކުޅުންތެރިއަކު ލަނޑެއް ޖަހައި އިތުރު ލަނޑެއް ޖެހުމަށް އެހީތެރިވެދީފައެވެ. ޚާއްޞަކޮށް މުސިއާލާ ވަނީ މުޅި މެޗުގައި މޮޅު ކުޅުމެއް ދައްކައި، ގިނަ ފުރުސަތުތަކެއް އުފައްދާފައެވެ. ބަޔާންގެ މި ކާމިޔާބީއާއެކު، ކުރިއަށް އޮތް މެޗުތަކުން އެކަށީގެންވާ ނަތީޖާއެއް ހޯދައިގެން ލީގު ތަށި އުފުލާލުމުގެ ފުރުސަތު އެ ޓީމަށް މިހާރު ވަނީ ވަރަށް ބޮޑަށް ތަނަވަސްވެފައެވެ.