ޗާގޯސް އާކިޕެލަގޯ (ފޯޅަވަހި) މޮރިޝަސްގެ ސަރުކާރާ ހަވާލުކުރުމުގެ މަސައްކަތް މަޑުޖައްސާލުމަށް އިނގިރޭސިވިލާތުގެ ސަރުކާރުން ނިންމި ނިންމުމަށް ދިވެހި ސަރުކާރުން މަރުހަބާ ކިޔައިފިއެވެ.

މިކަމާ ގުޅިގެން ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އިނގިރޭސި ސަރުކާރުގެ މި ނިންމުމަކީ ރާއްޖެއިން ބަލައިގަންނަ ހެޔޮ ބަދަލެއް ކަމަށެވެ.

Ad by Hajj Corporation

ދިވެހި ސަރުކާރުން ފާހަގަކުރި ގޮތުގައި ފޯޅަވަހީގެ ކުރިމަގާއި އެ ސަރަހައްދު ބެލެހެއްޓުމާ ގުޅޭ ކަންކަމުގައި ދިވެހިރާއްޖޭގެ ގާނޫނީ އަދި ހައްގު މަސްލަހަތުތަކެއް އެކުލެވިގެންވެއެވެ. އަދި އިނގިރޭސިވިލާތުން މި މަސައްކަތް މަޑުޖައްސާލުމަށް ނިންމި ނިންމުމުގެ ސަބަބުން، މި މައްސަލައިގައި ދިވެހިރާއްޖެއާއެކު އަލުން ފުޅާ ދާއިރާއެއްގައި މަޝްވަރާތައް ފެށުމަށް ފުރުސަތު ލިބިގެންދާނެ ކަމަށް ރާއްޖެއިން ދެކޭ ކަމަށްވެސް އެ މިނިސްޓްރީން ބުނެފައިވެއެވެ.

މީގެ އިތުރުން، ދިވެހިރާއްޖޭގެ ހައްގުތަކަށް ފުރިހަމައަށް އިހުތިރާމްކުރާ، ސަރަހައްދީ ހަމަޖެހުމަށް ބާރުދޭ، އަދި ބައިނަލްއަގުވާމީ ގާނޫނުތަކާ އެއްގޮތްވާނެ ފަދަ އިންސާފުވެރި ނަތީޖާއަކަށް ވާސިލުވުމަށް ދިވެހި ސަރުކާރުން ވަނީ އިނގިރޭސި ސަރުކާރަށް އިލްތިމާސްކޮށްފައެވެ.

ރާއްޖެއިން ބޭނުންވަނީ އިންޑިއާ ކަނޑުގެ ދިގު މުއްދަތުގެ ރައްކާތެރިކަމާއި ދެމެހެއްޓެނިވިކަން ކަށަވަރުކޮށްދޭނެ ފަދަ ހައްލެއް މި މައްސަލައިގައި ހޯދުމަށެވެ.

މި މައްސަލައިގައި ރާއްޖޭގެ މަސްލަހަތު ހިމާޔަތްކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ދަނީ ބައިނަލްއަގުވާމީ މައިދާނުގައި ގިނަ މަސައްކަތްތަކެއް ކުރަމުންނެވެ.