ދައުލަތުގެ ބެލުމުގެ ދަށުގައި ތިބޭ ކުދިން ފޮސްޓަރ ކުރާ ނުވަތަ އެކުދިންގެ ބެލެނިވެރިކަމާ ހަވާލުވާ ސިވިލް ސަރވިސް މުވައްޒަފުންނަށް މުސާރަ ލިބޭގޮތަށް ޚާއްޞަ ޗުއްޓީއެއް ދޭން ސިވިލް ސަރވިސްގެ ގަވާއިދު އިސްލާހުކޮސްފިއެވެ.

މި އިޞްލާޙުގައިވާ ގޮތުން، ފޮސްޓަރ ނިޒާމުގެ ދަށުން ދައުލަތުގެ ބެލުމުގެ ދަށުގައި ތިބޭ ކުދިން އާއިލީ މާހައުލަކަށް ފޮނުވުމުގެ ގޮތުން ހަވާލުކުރާ ކުދިން ބަލަހައްޓާ ސިވިލް ސަރވިސް މުވައްޒަފުންނަށް މި ޗުއްޓީ ލިބޭނެއެވެ. މިއީ ދައުލަތުގެ ބެލުމުގެ ދަށުގައި ތިބޭ ކުދިންނަށް އާއިލީ ލޯތްބާއި އަޅާލުން ފޯރުކޮށްދިނުމަށް ބާރުއެޅުމުގެ ގޮތުން ސަރުކާރުން އެޅި މުހިންމު ފިޔަވަޅެކެވެ.

Ad by Hajj Corporation

އިޞްލާޙު ކުރެވުނު ގަވާއިދުގައި މުވައްޒަފުންނަށް ޗުއްޓީ ދޭނެ ގޮތުގެ ތަފްޞީލުތައް ވަނީ ބަޔާންކޮށްފައެވެ. އެގޮތުން ހަވާލުވާ ކުއްޖާގެ އުމުރުން 6 މަސް ނުފުރޭނަމަ، 6 މަސް ދުވަސް ހަމަވުމާ ހަމައަށް ޗުއްޓީއެއް ލިބޭނެއެވެ. އަދި ކުއްޖާގެ އުމުރުން 6 މަސް ފުރެން 30 ދުވަހަށް ވުރެ ކުރު މުއްދަތެއް އޮތްނަމަ، 30 ދުވަހުގެ ޗުއްޓީއެއް ލިބޭނެއެވެ. މީގެ އިތުރުން ކުއްޖާގެ އުމުރުން 6 މަސް ފުރިފައިވާ ނަމަވެސް، 30 ދުވަހުގެ ޗުއްޓީއެއް މުވައްޒަފަށް ލިބޭނެއެވެ.

މި ހުރިހާ މުއްދަތެއްގައިވެސް މުވައްޒަފަށް މުސާރައާއި އިނާޔަތްތައް އުނިނުވެ ލިބޭނެ ކަމަށް ގަވާއިދުގައި ބަޔާންކޮށްފައިވެ އެވެ.
މީގެ އިތުރުން، ދައުލަތުގެ ބެލުމުގެ ދަށުގައި ތިބޭ ކުދިންނާ ހަވާލުވާ އާންމު ފަރާތްތަކަށް އެހީތެރިވުމުގެ ގޮތުން، މަހަކު 5،000 ރުފިޔާގެ ޚާއްޞަ އެލަވަންސެއް ދިނުމަށްވެސް ވަނީ ނިންމާފައެވެ. ނަމަވެސް މމި އެލަވަންސް ދޭނީ އެފަރާތްތަކުގެ މާލީ ހާލަތަށް ރިއާޔަތްކުރުމަށްފަހުގައެވެ.

ހަމައެއާއެކު، ވަޒީފާއާ ބެހޭ ޤާނޫނަށް ގެނައި ބަދަލަކާއެކު، ވިހައިގެން ވަޒީފާއަށް ނުކުންނަ މައިންނަށް ދަރިފުޅަށް ދެ އަހަރު ވަންދެން ދުވާލަކު ދެ ފަހަރު 30 މިނެޓުގެ ބްރޭކެއް ދިނުމަށްވެސް މިހާރު ވަނީ ހަމަޖައްސާފަ އެވެ. މި ބްރޭކް ގަޑިތަކަކީވެސް މުސާރަ ލިބޭ ގޮތަށް ހަމަޖައްސާފައިވާ ވަގުތުތަކެކެވެ.

މި ބަދަލުތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން، އާއިލީ ގުޅުންތައް ބަދަހިކުރުމަށާއި ކުޑަކުދިންގެ ހައްގުތައް ރައްކާތެރިކުރުމަށް ކުރަމުންދާ މަސައްކަތްތަކުގެ ތެރެއިން ގެނެވުނު ހެޔޮ ބަދަލުތަކެކެވެ.