ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ސެކްރެޓަރީ ޖެނަރަލްގެ މަގާމަށް މޫސާ ފަތުހީ އާދަމް ހަމަޖައްސައިފިއެވެ.

ޕީއެންސީން ވަނީ މި މަގާމަށް ފަތުހީ އައްޔަންކުރިކަން ކަށަވަރުކޮށްދީ، އޭނާއަށް މަރުޙަބާ ކިޔާފައެވެ.

Ad by Hajj Corporation

މޫސާ ފަތުހީ އާދަމް އަކީ މިހާރުވެސް ސަރުކާރުގެ ސްޓޭޓް މިނިސްޓަރެއްގެ މަގާމު ފުރުއްވަމުން ގެންދަވާ ބޭފުޅެކެވެ.

ޕާޓީގެ އިދާރީ ހިންގުމުގެ އެންމެ އިސް މަގާމާ އޭނާ ހަވާލުވެވަޑައިގަތީ ޕާޓީގެ ހަރަކާތްތައް ވަރުގަދަކުރުމަށް ކުރަމުންދާ މަސައްކަތްތަކުގެ ތެރެއިންނެވެ.

ޕީއެންސީގެ ސެކްރެޓަރީ ޖެނަރަލްގެ މަގާމު ހުސްވީ އެ މަގާމުގައި ކުރިން ހުންނެވި މުއާޒް ހަލީމް، 18 އޭޕްރިލް 2024 ގައި މަގާމުން އިސްތިއުފާ ދެއްވުމާ ގުޅިގެންނެވެ. މުއާޒް އިސްތިއުފާ ދެއްވަމުން ވިދާޅުވެފައިވަނީ ޕާޓީގެ ސެކްރެޓަރީ ޖެނަރަލްގެ މަގާމަކީ ގިނަ ވަގުތު ދޭންޖެހޭ މަގާމަކަށް ވާއިރު، އޭނާއަށްވުރެ ފުރިހަމައަށް ވަގުތު ދެވޭނެ ބޭފުޅަކު އެ މަގާމުގައި ހުރުމަކީ މުހިންމު ކަމެއް ކަމަށް ދެކިވަޑައިގަންނަވާ ކަމަށެވެ.

އަލަށް އައްޔަންކުރެވުނު އެސްޖީއާއެކު ޕީއެންސީގެ އިދާރީ ހިންގުން އިތުރަށް ހަރުދަނާވެ، ޕާޓީގެ ސިޔާސީ ހަރަކާތްތަކަށް އާ ދިރުމެއް ލިބިގެންދާނެ ކަމަށް އެ ޕާޓީން އުންމީދު ކުރެއެވެ.