ކްރިސްޓިއާނޯ ރޮނާލްޑޯގެ އެހީތެރިކަމާއެކު ސައުދީ އަރަބިއްޔާގެ އަލް ނަޞްރުން ގަތަރުގެ އަލް އަހްލީ އެސްސީ 5-1 ގެ ނަތީޖާއަކުން ބަލިކޮށް، އޭޝިއަން ޗެމްޕިއަންސް ލީގު ޓޫގެ ފައިނަލަށް ދަތުރުކޮށްފިއެވެ. މިއީ 2022 ވަނަ އަހަރުގެ ޑިސެމްބަރު މަހު ރޮނާލްޑޯ އެ ކްލަބާ ގުޅުނު ފަހުން ބޮޑު މުބާރާތެއްގެ ތަށި ހޯދުމާ އެންމެ ގާތަށް އެ ޓީމު ދިޔަ ފަހަރެވެ.

ބުދަ ދުވަހު ކުޅުނު މި މެޗުގައި 41 އަހަރުގެ ޕޯޗުގަލް ތަރި ރޮނާލްޑޯ 78 މިނެޓު ވަންދެން ކުޅުނު ނަމަވެސް، އޭނާއަށް ލަނޑެއް ކާމިޔާބު ކުރެވޭ ގޮތެއް ނުވިއެވެ. ނަމަވެސް ފްރާންސްގެ އިންޓަނޭޝަނަލް ކުޅުންތެރިޔާ ކިންގްސްލީ ކޯމަން ހެދި ހެޓްރިކާއެކު އަލް ނަޞްރުން ވަނީ ފަހަތުން އަރައި ބޮޑު މޮޅެއް ހޯދާފައެވެ.

Ad by Hajj Corporation

މެޗުގެ ކުރީކޮޅު އަލް އަހްލީއަށް ލީޑު ނެގުމަށް ރަނގަޅު ފުރުސަތެއް ލިބުނެވެ. މެޗުގެ ހަތްވަނަ މިނެޓުގައި ޖަރުމަނުގެ ކުރީގެ ތަރި ޖޫލިއަން ޑްރެކްސްލާ ފޮނުވާލި ޕެނަލްޓީ، އަލް ނަޞްރުގެ ބްރެޒިލް ކީޕަރު ބެންޓޯ ވަނީ ދިފާއުކޮށްފައެވެ. އެހެންނަމަވެސް، އޭގެ ހަތަރު މިނެޓު ފަހުން ސެކޫ ޔަންސާނޭ ކާމިޔާބު ކުރި ލަނޑުން ގަތަރުގެ ޓީމުން މެޗުގެ ލީޑު ނެގިއެވެ.

އަލް ނަޞްރުން ވަނީ ވަރަށް އަވަހަށް މެޗުގެ ނަތީޖާ ހަމަހަމަކޮށްފައެވެ. އެންޖެލޯ ތަނަވަސްކޮށްދިން ފުރުސަތަކުން ކޯމަން ފުރަތަމަ ލަނޑު ޖެހިއިރު، މެޗުގެ މެދުތެރެއިން ސާޑިއޯ މާނޭ ދިން ބޯޅައަކުން އެންޖެލޯ ވަނީ ލަނޑެއް ޖަހައި އަލް ނަޞްރަށް ފުރަތަމަ ފަހަރަށް ލީޑު ހޯދައިދީފައެވެ. ފުރަތަމަ ހާފު ނިމުމުގެ ކުރިން ކޯމަން ވަނީ އޭނާގެ ދެވަނަ ލަނޑު ޖަހައި ސްކޯ 3-1 އަށް ބަދަލުކޮށްފައެވެ.

2025 ވަނަ އަހަރު ބަޔާން މިއުނިކުން އަލް ނަޞްރާ ގުޅުނު ކޯމަން އޭނާގެ ހެޓްރިކް ފުރިހަމަކުރީ މެޗުގެ 64 ވަނަ މިނެޓުގައެވެ. އަދި މެޗު ނިމެން އުޅެނިކޮށް އަބްދުﷲ އަލް ހަމްދާން ވަނީ އިތުރު ލަނޑެއް ޖަހައި ޓީމުގެ މޮޅު ކަށަވަރުކޮށްދީފައެވެ.

ސައުދީ ޕްރޯ ލީގުގެ އެއްވަނައިގައި އޮތް އަލް ނަޞްރުން ފައިނަލް މެޗުގައި ބައްދަލުކުރާނީ ޖަޕާނުގެ ގަމްބާ އޮސާކާއާއެވެ. މި ފައިނަލް މެޗު އޮންނާނީ އަންނަ މެއި މަހުގެ 17 ވަނަ ދުވަހު ސައުދީގައެވެ.