ޕޯޗުގަލް އަދި އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯގެ ކާމިޔާބު ޕްރޮފެޝަނަލް ފުޓްބޯޅަ ކެރިއަރު، 2026/27 ސީޒަނަށްފަހު ނިންމާލަން ނިންމާފައިވާ ކަމަށް އޭނާ ހާމަކޮށްފިއެވެ.

އުމުރުން 41 އަހަރުގެ ފޯވާޑް މިކަން ހާމަކޮށްފައިވަނީ 'ވޯގް' (Vogue) މަޖައްލާއަށް ދިން އިންޓަވިއުއެއްގައެވެ. އެ އިންޓަވިއުގައި އޭނާ ބުނީ ކުރިއަށް އޮތް ސީޒަނަށްފަހު ފުޓްބޯޅަ ކުޅުން ހުއްޓާލާނެ ކަމަށް ލަފާކުރެވޭ ކަމަށެވެ.

Ad by Hajj Corporation

"މިއީ ފަހަރުގައި ފުޓްބޯޅައިގައި އަހަރެންގެ ފަހު އަހަރަށް ވެދާނެ. އަދި އަހަރެން ބޭނުންވަނީ ވަރަށް ފުރިހަމަ ހަނދާންތަކަކާއެކު މި ކެރިއަރު ނިންމާލަން،" އިންޓަވިއުގައި ވާހަކަދައްކަމުން ރޮނާލްޑޯ ބުންޏެވެ.

މި ހޫނުމޫސުމުގައި ޕޯޗުގަލްއާއެކު އޭނާގެ ހަވަނަ ވޯލްޑް ކަޕް ކުޅުމަށްފަހު، ރޮނާލްޑޯ މިހާރު ތައްޔާރުވަމުން އަންނަނީ ސައުދީ ކްލަބް އަލް ނަސްރާއެކު އައު ސީޒަނެއް ފެށުމަށެވެ. އޭނާގެ ފާހަގަކޮށްލެވޭ ސީނިއާ ކެރިއަރު ފެށުނީ 2002 ވަނަ އަހަރު ސްޕޯޓިންގ ސީޕީއިންނެވެ. އޭގެ ފަހުން އޭނާ ވަނީ މެންޗެސްޓަރ ޔުނައިޓެޑް، ރެއާލް މެޑްރިޑް، ޔުވެންޓަސް އަދި އަލް ނަސްރު ފަދަ ދުނިޔޭގެ ނުފޫޒުގަދަ ކްލަބުތަކަށް ކުޅެފައެވެ.

ޕްރޮފެޝަނަލް ފުޓްބޯޅައިގައި ވޭތުވެދިޔަ 20 އަހަރަށްވުރެ ދިގު މުއްދަތުގައި، ރޮނާލްޑޯ ވަނީ ކްލަބަށާއި ގައުމީ ޓީމަށް ޖުމްލަ 976 ލަނޑު ޖަހައިދީފައެވެ. އަދި ދުނިޔޭގެ އެންމެ މޮޅު ކުޅުންތެރިޔާއަށް ދޭ ޝަރަފުވެރި ބެލަންޑިއޯ އެވޯޑު ފަސް ފަހަރު އޭނާ ވަނީ ކާމިޔާބުކޮށްފައެވެ.