ޔުއެފާ ނޭޝަންސް ލީގުގައި ބުރާސްފަތި ދުވަހު ޑެންމާކާ ދެކޮޅަށް ކުޅޭ މެޗުގެ ފުރަތަމަ އެގާރައިގައި ތަޖުރިބާކާރު ފޯވާޑް ކްރިސްޓިއާނޯ ރޮނާލްޑޯ ނުހިމެނޭނެ ކަމަށް ހެޑް ކޯޗު ޖޯޖް ޖީސަސް ބުނިތާ މަދު ގަޑިއިރުތަކެއްގެ ތެރޭގައި، ރޮނާލްޑޯ ޕޯޗުގަލް ގައުމީ ޓީމުގެ ކޭމްޕް ދޫކޮށް ބުދަ ދުވަހު ހިނގައްޖެ އެވެ.

ޕޯޗުގަލްގެ ފުޓްބޯޅަ ފެޑެރޭޝަންގެ ރައީސް ޕެޑްރޯ ޕްރޮއެންސާއާ ވާހަކަދެއްކުމަށްފަހު، ކޭމްޕް ދޫކޮށް ދިޔަކަން އުމުރުން 41 އަހަރުގެ ރޮނާލްޑޯ ވަނީ ސޯޝަލް މީޑިއާގައި ކަށަވަރުކޮށްދީފަ އެވެ. ރޮނާލްޑޯ ބުނީ، "ގައުމީ ޓީމުގެ ކޯޗުގެ ނޫސްވެރިންގެ ބައްދަލުވުމަށްފަހު، އަދި ޕޯޗުގަލް ފުޓްބޯޅަ ފެޑެރޭޝަންގެ ރައީސާ ވާހަކަދެއްކުމަށްފަހު، އަހަރެން ނިންމީ ގައުމީ ޓީމުގެ ޓްރެއިނިން ކޭމްޕް ދޫކޮށް ދިއުމަށް،" ކަމަށެވެ. އަދި އޭނާ އަބަދުވެސް ވަފާތެރިކަމާއެކު ހިދުމަތްކުރި ގައުމީ ޓީމު ދޫކޮށް ދިޔަ ސަބަބުގެ ހަގީގަތް އެންމެ އެކަށީގެންވާ ވަގުތުގައި ޕޯޗުގަލްގެ ހުރިހާ ރައްޔިތުންނަށް ހާމަކުރާނެ ކަމަށް ބުނެ، ޓީމުގެ ކުޅުންތެރިންނަށް ކާމިޔާބީއަށް އެދިފައިވެ އެވެ.

Ad by Hajj Corporation

ކޯޗު ޖީސަސް ބުނެފައިވަނީ ޑެންމާކާ ދެކޮޅަށް ކުޅޭ މެޗުގައިވެސް ރޮނާލްޑޯ ފަށާނީ ބެންޗުން ކަމަށާއި، ހަމަލާތައް އިސްވެ ބަލަހައްޓާނީ ގޮންސާލޯ ރާމޮސް ކަމަށެވެ. ދެމީހުންގެ ދެމެދުގައި އެއްވެސް މައްސަލައެއް ނެތް ކަމަށް ބުނަމުން ޖީސަސް ބުނީ، "އަހަރެން އޭނާގެ ބޭނުން ޖެހިއްޖެނަމަ ކުޅެން އަރުވާނަން. ބޭނުން ނުވެއްޖެނަމަ ނާރުވާނަން،" ކަމަށެވެ. އަދި ނޯވޭ މެޗުގައި ވޯމްއަޕް ކުރުމަށްފަހު ކުޅެން ނޭރުވުމުން ރޮނާލްޑޯ މާޔޫސްވިކަން ގަބޫލުކުރާ ކަމަށާއި، އެހެން ނަމަވެސް ޓީމު ނެގުމަކީ އޭނާގެ ޒިންމާއެއް ކަމަށް ކޯޗު ފާހަގަކުރި އެވެ.

ނޭޝަންސް ލީގުގައި މިދިޔަ އާދީއްތަ ދުވަހު ނޯވޭ އަތުން 2-1 އިން ޕޯޗުގަލް މޮޅުވި މެޗުގައި ރޮނާލްޑޯ ބެންޗުގައި އިނދެ މެޗު ނިންމާލަން ޖެހުނުއިރު، މިއީ ވޭތުވެދިޔަ 18 އަހަރަށްވުރެ ގިނަ ދުވަހުގެ ތެރޭގައި ފިޓްކޮށް ހުރެ އޭނާ ވާދަވެރި ބައިނަލްއަގުވާމީ މެޗެއްގައި ނުކުޅެ ދޫކޮށްލި ފުރަތަމަ ފަހަރެވެ. އޭގެ ފަހުން އޭނާ ޓީމުގެ ފަރިތަކުރުންތަކުގައި ބައިވެރިވެފައި ނުވާއިރު، ބުދަ ދުވަހު ކޯޕަންހޭގަންގައި ސްކޮޑާއެކު ސްޓޭޑިއަމަށް ދިޔަ ނަމަވެސް ފަރިތަކުރުންތަކުގައި ބައިވެރިވެފައެއް ނުވެ އެވެ.

ކްރިސްޓިއާނޯ ރޮނާލްޑޯއަކީ ޕޯޗުގަލްގެ ގައުމީ ޓީމަށް އެންމެ ގިނަ މެޗު ކުޅެދީ، އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ. އޭނާ ވަނީ ގައުމީ ޓީމަށް ކުޅެދިން 234 މެޗުގައި 146 ލަނޑު ކާމިޔާބުކޮށްދީފަ އެވެ.