ސްޕެނިޝް ލަލީގާގައި ސެލްޓަ ވިގޯއާ ދެކޮޅަށް ކުޅުނު މެޗުން 1-0 އިން މޮޅުވެ، ތާވަލުގެ އެއްވަނައިގައި ބާސެލޯނާ އިން ނުވަ ޕޮއިންޓުގެ ލީޑެއް އަލުން ހޯދައިފިއެވެ. ނަމަވެސް، މި މެޗުގައި އެ ޓީމުގެ ތަރި ލަމީން ޔަމާލަށް ލިބުނު އަނިޔާއާ ގުޅިގެން ކްލަބުގެ ކަންބޮޑުވުންތަކެއް ވަނީ އުފެދިފައެވެ.

މެޗުގެ ހަމައެކަނި ލަނޑު 40 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ އުމުރުން 18 އަހަރުގެ ޔަމާލެވެ. ޔަމާލް މި ޕެނަލްޓީ ކާމިޔާބުކުރީ އޭނާއަށް ޔޮއެލް ލާގޯ ކުރި ފައުލަކާ ގުޅިގެން ލިބުނު ޕެނަލްޓީއަކުންނެވެ. ނަމަވެސް، ލަނޑު ޖެހުމަށްފަހު ވަގުތުން އޭނާގެ ފައިގެ ފަހަތު މަސްގަނޑުގައި (ހެމްސްޓްރިންގް) ހިފަހައްޓައިގެން ހުރި މަންޒަރު ފެނުނުއިރު، އޭނާ ވަނީ އަނިޔާގެ ސަބަބުން ދަނޑުން ބާލާފައެވެ.

Ad by Hajj Corporation

ކޭމްޕް ނޯގައި ކުޅުނު މި މެޗު ފެށުނީ ވަރަށް ފޯރިގަދަކޮށެވެ. މެޗު ފެށިގެން އެންމެ ނުވަ ސިކުންތުގެ ތެރޭގައި ޔަމާލް ފޮނުވާލި ހަމަލާއެއް ގޯލާ އަމާޒުނުވެ ދިޔައިރު، އޭގެ 31 ސިކުންތު ފަހުން ސެލްޓަ ވިގޯގެ ޕަބްލޯ ޑުރާން ފޮނުވާލި ހަމަލާއެއް ބާސާގެ ކީޕަރު ހުއްޓުވިއެވެ. މީގެ އިތުރުން، 15 ވަނަ މިނެޓުގައި ސެލްޓަ ވިގޯގެ ފެރާން ޖުޓްގްލާއަށް ލަނޑު ޖަހާނެ ރަނގަޅު ފުރުސަތެއް ލިބި ބޭކާރުވިއެވެ.

މި މޮޅާއެކު ބާސެލޯނާ އިން ވަނީ ޔޫރަޕްގެ ގަދަ ފަސް ލީގުގެ ތެރެއިން އެންމެ ގިނަ މެޗުގައި މެދުނުކެނޑި ލަނޑު ޖެހުމުގެ ރެކޯޑު ދަމަހައްޓާފައެވެ. އެ ޓީމުން މިހާރު ވަނީ ޖެހިޖެހިގެން 52 މެޗުގައި 137 ލަނޑު ޖަހާފައެވެ. މިއީ 2013 ވަނަ އަހަރުގެ ފަހުން އެ ޓީމުން މި މުބާރާތުގައި ދަމަހައްޓާ އެންމެ ދިގު ރެކޯޑެވެ.

ލަމީން ޔަމާލް ވަނީ މި ސީޒަނުގެ ލަލީގާގައި މިހާތަނަށް 16 ލަނޑު ޖަހާފައެވެ. މިއީ މި ގަރުނު ފެށުނު ފަހުން ބާސެލޯނާއަށް އެއް ސީޒަނެއްގައި ސްޕެއިންގެ ކުޅުންތެރިއަކު އެންމެ ގިނަ ލަނޑު ޖެހި ދެވަނަ ފަހަރެވެ. މި ރެކޯޑު އޮތީ 2010-11 ސީޒަނުގައި 18 ލަނޑު ޖެހި ޑޭވިޑް ވިޔާ އަތުގައެވެ.