ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަނުގައި ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމަރީގެ ވޯޓުލުން ފަށައިގެން ކުރިއަށް އެބަދެއެވެ.

މި ޕްރައިމަރީގެ ވޯޓުލުން މިއަދު ހެނދުނު 9:00ގައި ފަށައިފައިވާއިރު، ވޯޓުލުން ކުރިއަށްދާނީ ހަވީރު 4:00އާ ހަމައަށެވެ. ޕީއެންސީން މަޢުލޫމާތު ދޭ ގޮތުގައި، މި އިންތިޚާބުގައި 727 މީހުންނަށް ވޯޓުލުމުގެ ޙައްޤު ލިބިގެންވެ އެވެ.

Ad by Hajj Corporation

މި އިންތިހާބުގައި ހިތަދޫގައި ވޯޓު ފޮށި ބެހެއްޓިފައިވަނީ ހިތަދޫ ސްކޫލުގަ އެވެ. އަދި މާލޭގައި ދިރިއުޅޭ އެ ދާއިރާގެ ރައްޔިތުން ވޯޓުލުމަށް ޚާއްޞަ ފޮށި ބެހެއްޓިފައިވަނީ ކަލާފާނު ސްކޫލުގައެވެ.

ވޯޓުލުމުގެ އިންތިޒާމުތައް ތަރުތީބުކޮށްފައިވާ ގޮތުން، 2026 ވަނަ އަހަރުގެ ލޯކަލް ކައުންސިލް އިންތިޚާބުގައި ހިތަދޫ އުތުރު ދާއިރާއަށް ރަޖިސްޓްރީވެފައިވާ ފަރާތްތަކުން ވޯޓުލާނީ ހިތަދޫގައި ބެހެއްޓިފައިވާ ފޮއްޓަށެވެ. އަދި މާލެއާއި އަތޮޅުތެރޭގެ އެހެން ރަށްތަކަށް ރަޖިސްޓްރީވެފައިވާ އެ ދާއިރާގެ މެންބަރުން ވޯޓުލުމަށް ހަމަޖެހިފައިވަނީ މާލޭގައި ބެހެއްޓިފައިވާ ވޯޓު ފޮށްޓަށެވެ.

މި ޕްރައިމަރީގައި ވާދަކުރައްވަނީ އެ ދާއިރާގެ ކުރީގެ މެންބަރު މުޙައްމަދު ސިނާންގެ އިތުރުން، ހިތަދޫ މޫލެކެޑެ ދާއިރާގެ މިހާރުގެ ކައުންސިލަރު އަޙްމަދު ސަޢީދެވެ.

ހިތަދޫ އުތުރު ދާއިރާގެ ގޮނޑި ހުސްވީ، އެ ދާއިރާގެ މެންބަރުގެ މައްޗަށް ސާބިތު ދަރަންޏެއް އޮތް ކަމަށް ކަނޑައަޅައި، އޭނާގެ ގޮނޑި ގެއްލިފައިވާ ކަމަށް މި މަހުގެ 12 ވަނަ ދުވަހު ސުޕްރީމް ކޯޓުން ޙުކުމް ކުރުމާ ގުޅިގެންނެވެ. އެއީ މޯލްޑިވްސް އިސްލާމިކް ބޭންކުން ނެގި 2.5 މިލިއަން ރުފިޔާގެ ލޯނަކަށް، ކޯޓު ޙުކުމާ އެއްގޮތަށް ފައިސާ ދައްކަމުން ނުދާ މައްސަލައެއްގައެވެ.