އިނގިރޭސި ޕްރިމިއާ ލީގުގައި ހޮނިހިރު ދުވަހު އަމިއްލަ ދަނޑުގައި ކްރިސްޓަލް ޕެލަސްއާ ބައްދަލުކުރި މެޗު 3-1 އިން ކާމިޔާބުކޮށް، ލިވަޕޫލުން ލީގުގައި ޖެހިޖެހިގެން ތިންވަނަ މޮޅު ހޯދައިފިއެވެ. އެންފީލްޑްގައި ކުޅުނު މި މެޗުގައި ލިވަޕޫލްގެ ލަނޑުތައް ކާމިޔާބުކޮށްދިނީ އެލެކްސެންޑަރ އީސާކް، އެންޑްރޫ ރޮބަޓްސަން އަދި ފްލޯރިއަން ވާޓްޒް އެވެ.

މެޗުގެ ކުރީކޮޅު މުހައްމަދު ސަލާހަށް ލިބުނު ޕެނަލްޓީއެއް ވީއޭއާރުން ބަލައި ކެންސަލްކޮށްފައި ވަނިކޮށް، ލިވަޕޫލަށް ލީޑު ނަގައިދިނީ އީސާކްއެވެ. އޭނާ މި ލަނޑު ކާމިޔާބުކުރީ އެލެކްސިސް މެކް އެލިސްޓާ ފޮނުވާލި ބާރު ހަމަލާއެއް ކޮންޓްރޯލް ކުރުމަށްފަހު، ކީޕަރު ޑީން ހެންޑަސަންއަށް ފުރުސަތެއް ނުދީ ގޯލުގެ ތެރެއަށް ފޮނުވާލައިގެންނެވެ. މިއީ އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުރުމަށްފަހު އީސާކް ދެއްކި މޮޅު ކުޅުމެކެވެ.

Ad by Hajj Corporation

ލިވަޕޫލްގެ ދެވަނަ ލަނޑު ފެނިގެންދިޔައީ ވަރަށް ހަލުވި ކައުންޓަރ އެޓޭކެއްގައެވެ. ލިވަޕޫލްގެ ތިންވަނަ ކީޕަރު ފްރެޑީ ވުޑްމަން، ޕެލަސްގެ މަޓޭޓާ ފޮނުވާލި ނުރައްކާތެރި ހަމަލާއެއް ދިފާއުކުރުމާއެކު ފެށި މި އެޓޭކުގައި، ކާޓިސް ޖޯންސް ތަނަވަސްކޮށްދިން ފުރުސަތަކުން ރޮބަޓްސަން ވަނީ ލަނޑު ޖަހާފައެވެ. ކީޕަރުގެ ސޭވްއާއި ލަނޑާ ދެމެދު ހޭދަވީ އެންމެ 15 ސިކުންތެވެ.

ދެވަނަ ހާފުގައި ކްރިސްޓަލް ޕެލަސްއިން ލަނޑެއް ޖަހައި ފަރަގު ކުޑަކުރިއެވެ. މި ލަނޑު ޑެނިއަލް މުނޯޒް ކާމިޔާބުކުރީ ލިވަޕޫލްގެ ކީޕަރު ވުޑްމަން އަނިޔާވެގެން ބިމުގައި އޮއްވައެވެ. މިއާއެކު ޕެލަސްއިން މެޗުގެ ނަތީޖާ ހަމަހަމަކުރުމަށް ބާރުބޮޑުކުރި ނަމަވެސް، މެޗުގެ އިތުރު ވަގުތުގެ ތެރޭގައި ފްލޯރިއަން ވާޓްޒް ކާމިޔާބުކުރި ހިތްގައިމު ހާފް-ވޮލީއާއެކު ލިވަޕޫލުން މެޗުގެ ތިން ޕޮއިންޓް ކަށަވަރުކުރިއެވެ.

ތަފާސްހިސާބުތަކަށް ބަލާއިރު، އީސާކް ޕްރިމިއާ ލީގުގައި ލިވަޕޫލަށް ޖަހައިދިން ތިން ލަނޑަކީވެސް މެޗުގެ ފުރަތަމަ ލަނޑުތަކެވެ. އަދި އަލިސަން ބެކާ އާއި މަމަރްދަޝްވިލީއަށް އަނިޔާވެފައިވުމުން ކުޅެން އެރި ކީޕަރު ވުޑްމަން ވަނީ މެޗުގައި މުހިންމު ފަސް ސޭވްކޮށް، ޓީމުގެ މޮޅުގައި ބޮޑު ދައުރެއް އަދާކޮށްފައެވެ.