އާރްބީ ލައިޕްޒިގަށް ކުޅެމުން އަންނަ އައިވަރީ ކޯސްޓުގެ ވިންގަރު ޔާން ދިއޮމާންޑޭ، މި ސީޒަނަށްފަހު އެ ކްލަބް ދޫކޮށްލާނަމަ ބަދަލުވާން ބޭނުންވާ ކްލަބަކީ ޕީއެސްޖީ ކަމަށް ނިންމައިފިއެވެ. ދި އެތުލެޓިކްގެ މަޝްހޫރު ނޫސްވެރިޔާ ޑޭވިޑް އޯންސްޓީން ރިޕޯޓްކޮށްފައިވާ ގޮތުގައި، ދިއޮމާންޑޭ ވަނީ އޭނާގެ އިސްކަންދޭ މަންޒިލަކީ ޕީއެސްޖީ ކަމަށް ކަނޑައަޅާފައެވެ.

އިނގިރޭސި ކްލަބް ލިވަޕޫލުން ދިއޮމާންޑޭ ހޯދުމަށް ވަރަށް ބޮޑަށް މަސައްކަތް ކުރަމުންދާ ކަން ފާހަގަކުރެވެއެވެ. އެގޮތުން ލިވަޕޫލުން ވަނީ އޭނާ ހޯދުމަށް 100 މިލިއަން ޔޫރޯގެ ބިޑެއް ވެސް ހުށަހަޅާފައެވެ. ނަމަވެސް ލައިޕްޒިގުން ވަނީ އެ ހުށަހެޅުން ބަލައިނުގަނެ ބޭރުކޮށްލާފައެވެ.

Ad by Hajj Corporation

ދިއޮމާންޑޭ ޕީއެސްޖީއަށް ބަދަލުވާން ޝައުގުވެރިވީ އެ ކްލަބުގެ ޗެއާމަން ނާސިރު އަލް-ޚެއްލައިފީ އާއި ފުޓްބޯޅަ އެޑްވައިޒަރު ލުއިސް ކެމްޕޯސް ހުށަހެޅި ޕްރޮޖެކްޓާ މެދު ހިތްހަމަޖެހޭތީއެވެ. ޕީއެސްޖީއަށް ބަދަލުވުމަކީ ބެލޮންޑިއޯ ފަދަ ޝަރަފުވެރި އެވޯޑްތަކަށް ވާދަކުރުމަށް ލިބޭނެ ވަރަށް ބޮޑު ފުރުސަތެއް ކަމަށް އޭނާ ގަބޫލުކުރެއެވެ.

ޕީއެސްޖީން އަދި މިހާތަނަށް ލައިޕްޒިގާ ރަސްމީކޮށް ގުޅާފައެއް ނުވެއެވެ. އަދި އެއްވެސް ބިޑެއް ވެސް ހުށަހަޅާފައެއް ނުވެއެވެ. ޖަރުމަނުގެ ލައިޕްޒިގުން ބޭނުންވަނީ ދިއޮމާންޑޭ ވިއްކާލުމަށް 130 މިލިއަން ޔޫރޯގެ ޕެކޭޖެކެވެ.