ދުނިޔޭގެ ސިޔާސީ މަޝްރަހަށް އަންނަ ބޮޑެތި ބަދަލުތަކާއި، ބާރުގަދަ ގައުމުތަކުގެ މެދުގައި އުފެދިފައިވާ ހަނގުރާމަވެރި ފިކުރުތަކުގެ ސަބަބުން މުޅި ދުނިޔޭގެ އިގްތިސާދަށް ވަނީ ނުތަނަވަސްކަން ވެރިވެފައެވެ. ވަކިން ހާއްސަކޮށް މެދުއިރުމަތީގެ ހަމަނުޖެހުންތަކާއި، ދުނިޔޭގެ މައިގަނޑު ކަނޑުގެ މަގުތަކަށް ކުރިމަތިވެފައިވާ ގޮންޖެހުންތަކުގެ ސަބަބުން ކާބޯތަކެއްޗާއި ހަކަތައިގެ އަގުތައް ވަނީ އިންތިހާއަށް އުފުލިފައެވެ. މިފަދަ ނާޒުކު ދަނޑިވަޅެއްގައި، ރާއްޖެ ފަދަ އިމްޕޯޓަށް ބަރޯސާވާ ގައުމަކުން ފެންނަމުންދާ ހަމަޖެހުމަކީ ސަރުކާރުން ގެންގުޅުއްވާ ދުރުވިސްނޭ އަދި ހަރުދަނާ ސިޔާސަތުތަކުގެ ސީދާ ނަތީޖާއެވެ.

މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި މުދަލުގެ އަގު އުފުލުނު ކަމުގައި ވިޔަސް، ދިވެހި ރައްޔިތުންގެ އާންމު ދިރިއުޅުމަށް ބޭނުންވާ އަސާސީ ބާވަތްތަކާއި ސިނާއީ މަސައްކަތްތަކަށް ބޭނުންވާ ތަކެތި ދަތިކަމެއްނެތި ލިބޭނެކަން ކަށަވަރުކުރުމަށް ސަރުކާރުން ވަނީ ހާއްސަ އިސްކަމެއް ދެއްވާފައެވެ. މިގޮތުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އުފެއްދެވި ވަޒީރުންގެ ޚާއްޞަ ކޮމިޓީން ދާދިފަހުން ވެސް ވަނީ، ރާއްޖޭގެ ބާޒާރުން މުދާ ހުސްނުވެ ލިބެން ހުންނާނެކަމުގެ ފުރިހަމަ ޔަގީންކަން ރައްޔިތުންނަށް ދެއްވާފައެވެ. މިއީ ދުނިޔޭގެ އެހެން ގައުމުތަކާ އަޅާބަލާއިރު ރާއްޖެއަށް ލިބިފައިވާ ބޮޑު ނަސީބެކެވެ.

Ad by Hajj Corporation

އަވަށްޓެރި އޭޝިއާ ސަރަހައްދަށް ބަލާލާއިރު، "އޮޕަރޭޝަން އެޕިކް ފިއުރީ" އާއި ގުޅިގެން ކުރިމަތިވި އިގްތިސާދީ ލޮޅުންތަކާއި، ހޯރްމޫޒް ކަނޑުއޮޅި ބަންދުކޮށްފައި އޮތުމުގެ ސަބަބުން ގިނަ ގައުމުތަކެއް ވަނީ އިގްތިސާދީ ގޮތުން އިނދަޖެހިފައެވެ. 2026 ވަނަ އަހަރުގެ އޭޕްރީލް މަހުގެ ނިޔަލަށް އައިއިރު، ގިނަ ގައުމުތަކަކަށް ވަނީ "ސަވައިވަލް ބަޖެޓް" ނުވަތަ ސަލާމަތްތެރިކަމުގެ ބަޖެޓަކަށް އަމަލުކުރަން މަޖުބޫރުވެފައެވެ. މި ގައުމުތަކުގެ މައިގަނޑު އަމާޒަކީ ހަކަތައިގެ އަގު އުފުލުން މެނޭޖްކުރުމާއި ފައިސާގެ އަގު ހިފެހެއްޓުމެވެ.

ދެކުނު އޭޝިއާގެ ގައުމުތަކުން "ހަކަތައިގެ ކާފިއު" އެއް ހިންގަން ޖެހިފައިވާ މަންޒަރު މިއަދު ފެނެއެވެ. މިސާލަކަށް ޕާކިސްތާނުގައި ތެޔޮ ސަލާމަތްކުރުމަށްޓަކައި ސަރުކާރު އޮފީސްތައް ހަފްތާއަކު 4 ދުވަހަށް ބަދަލުކޮށް، ރޭގަނޑު 8 ޖަހާއިރު ވިޔަފާރިތައް ބަންދުކުރަން ވަނީ މަޖުބޫރުވެފައެވެ. އިންޑިއާއިން "ވޯ ސާޗާޖް" ނަގަން ފަށާފައިވާއިރު، ސްްރީލަންކާއިން ވަނީ އަލުން "ފިއުލް ޕާސް" ތައާރަފްކޮށް، އަމިއްލަ އުޅަނދުތަކަށް ހަފްތާއަކު 20 ލީޓަރުގެ ޕެޓްރޯލް ދޫކުރާ މިންވަރަށް ކޮންޓްރޯލްކޮށްފައެވެ.

ދެކުނު އިރުމަތީ އޭޝިއާގެ ހާލަތަށް ބަލާއިރު، ވިއެޓްނާމާއި ތައިލެންޑުން ވަނީ ބޮޑެތި އިންފްރާސްޓްރަކްޗާ މަޝްރޫއުތައް ހުއްޓާލައި، އެ ފައިސާ ކާބޯތަކެއްޗާއި ގަސްކާނާގެ ސަބްސިޑީއަށް ބަދަލުކޮށްފައެވެ. އިންޑޮނޭޝިއާގައި ތެލުގެ އަގު 40 އިންސައްތަ މައްޗަށް ދިއުމާ ގުޅިގެން ސަބްސިޑީތައް އުނިކޮށް، ފަގީރުންނަށް ޑިޖިޓަލް ވައުޗާ ދޫކުރަން ވަނީ ފަށާފައެވެ. މީގެ އިތުރުން ޖަޕާނާއި ދެކުނު ކޮރެއާ ފަދަ ކުރިއަރާފައިވާ ގައުމުތަކުން ވެސް ވަނީ ހަކަތަ ރައްކާތެރިކުރުމުގެ ގޮތުން ވިޔަފާރި ސަރަހައްދުތަކުގެ ބައްތިތަކާއި އޭސީ ބޭނުންކުރުން ހަރުކަށި އުސޫލުތަކަކުން ކޮންޓްރޯލްކުރަން ފަށާފައެވެ.

މި ހުރިހާ ގޮންޖެހުންތަކެއް ދުނިޔޭގެ ހުރިހާ ދިމާލަކުން ފެންނަމުންދާއިރު، ދިވެހިރާއްޖޭގައި އަސާސީ ހިދުމަތްތައް މެދުނުކެނޑި، ތަކެތީގެ އަގުތައް އަތްފޯރާ ފަށެއްގައި ހިފެހެއްޓިފައި ހުރުމަކީ ސަރުކާރުގެ ހަރުދަނާ ރޭވުންތެރިކަމުގެ ހެއްކެކެވެ. ދުނިޔޭގެ ބާޒާރުގެ އޮއިވަރަށް ބަލައި، ދުރާލައި ރައްކާތެރިކަމުގެ ފިޔަވަޅުތައް އެޅުމާއި، އިގްތިސާދީ ދުވެލި މަޑުޖެހުނަނުދީ ހިފެހެއްޓުމަށް ކުރާ މަސައްކަތުގެ ސަބަބުން، ދިވެހިންނަށް މި ދަތިތަކުގެ އަސަރު އިހްސާސްވަމުންދާ މިންވަރު ކުޑައެވެ. އެހެންކަމުން، ބައިނަލްއަގުވާމީ މި ބޮޑު ހަލަބޮލިކަމުގެ ތެރޭގައި ރާއްޖޭގައި އޮތް ހަމަޖެހުމަކީ ސަރުކާރުގެ ހަރުދަނާ ސިޔާސަތުތަކުގެ މައްޗަށް ބިނާވެފައިވާ ކަމެކެވެ.