އީރާނާއެކު ކުރަމުންދާ ހަނގުރާމައަކީ އެމެރިކާގެ ވައިޓް ހައުސްއަށް އުފުލަން ޖެހިފައިވާ ބޮޑު ބުރައަކަށް ވެފައިވާތީ، އެ ހަނގުރާމަ ނިންމުމަށް ރައީސް ޑޮނަލްޑް ޓްރަމްޕަށް ސިޔާސީ ގޮތުން ބޮޑެތި ފިއްތުންތަކެއް ކުރިމަތިވަމުންދާ ކަމަށް ރޮއިޓާސް އިން ރިޕޯޓްކޮށްފިއެވެ. މިކަން ހާމަކޮށްފައިވަނީ މި މައުލޫމާތު އެނގޭ އެމެރިކާގެ އިސް އޮފިޝަލުންނާ ހަވާލާދީއެވެ.

އަންގާރަ ދުވަހު ޝާއިއުކުރި ރިޕޯޓެއްގައިވާ ގޮތުން، ދެ މަސް ދުވަސްވެފައިވާ މި ހަނގުރާމައިގައި އެމެރިކާއިން އަމިއްލައަށް ކާމިޔާބީ އިއުލާނުކޮށްފިނަމަ، އީރާނުން އަމަލުކުރާނެ ގޮތްތަކެއް އެމެރިކާގެ އިންޓެލިޖެންސް އިދާރާތަކުން ދަނީ ދިރާސާ ކުރަމުންނެވެ. މި ހަނގުރާމައިގައި މިހާތަނަށް އެތައް ހާސް ބަޔަކު މަރުވެފައިވާއިރު، މިއީ މިހާރުގެ ސަރުކާރަށް ސިޔާސީ ގޮތުން ބޮޑު ގެއްލުމަކަށް ވަނީ ވެފައެވެ.

Ad by Hajj Corporation

އިސް އޮފިޝަލުންގެ އެދުމުގެ މަތިން، އިންޓެލިޖެންސް އިދާރާތަކުން ދަނީ މި ހަނގުރާމައިން އެމެރިކާގެ ސިފައިން ބޭލުމުން ނުކުމެދާނެ ނަތީޖާތައް ވަޒަންކުރަމުންނެވެ. ޓްރަމްޕްގެ މުޝީރުން ވަނީ ހަނގުރާމަ ކުރިއަށް ގެންދާނަމަ، އަންނަ ނޮވެމްބަރު މަހު ބާއްވާ މިޑްޓާމް އިންތިހާބުގައި ރިޕަބްލިކަން ޕާޓީއަށް ބޮޑެތި ނާކާމިޔާބީތަކަކާ ކުރިމަތިލާން ޖެހިދާނެ ކަމުގެ އިންޒާރު ދީފައެވެ.

ރޮއިޓާސްއަށް މައުލޫމާތު ދިން މަސްދަރުތަކުން ބުނި ގޮތުގައި، ފެބްރުއަރީ މަހު ފެށި އަސްކަރީ ކެމްޕޭނަށްފަހު އިންޓެލިޖެންސް އިދާރާތަކުން ވަނީ ވަގުތީ އެސެސްމަންޓެއް ތައްޔާރުކޮށްފައެވެ. އެ ރިޕޯޓުގައިވާ ގޮތުން، "ޓްރަމްޕް ކާމިޔާބީ އިއުލާނުކޮށް އެ ސަރަހައްދުން އެމެރިކާ ސިފައިން ބާލައިފިނަމަ، އީރާނުން އެކަން ދެކޭނީ އެ ގައުމަށް ލިބުނު ކާމިޔާބީއެއްގެ ގޮތުގައެވެ."

މީގެ އިތުރުން، އެމެރިކާއިން މޮޅުވި ކަމަށް ބުނެފައި، އެ ސަރަހައްދުގައި ގިނަ އަދަދެއްގެ ސިފައިން ބައިތިއްބައިފިނަމަ، އީރާނުން އެކަން ދެކޭނީ މަޝްވަރާގެ އުކުޅެއްގެ ގޮތުގައި ކަމަށް މަސްދަރުތަކުން ބުނެއެވެ. ނަމަވެސް އެއީ ހަނގުރާމަ މުޅިން ނިމުމަކަށް އަންނާނެ ކަމެއް ނޫން ކަމަށްވެސް އެ ފަރާތްތަކުން ފާހަގަކުރެއެވެ.