މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ ޑިރެކްޓަރުންގެ ބޯޑަށް، ސަރުކާރުގެ ކުންފުނިތައް ހިންގުމުގެ ދާއިރާގައި ގިނަ ތަޖުރިބާތަކެއް ހާސިލުކުރައްވާފައިވާ އަލްފާޟިލް މުޙައްމަދު ލަމްޢާން މިއަދު އައްޔަންކުރައްވައިފިއެވެ.

އޭނާ މި މަގާމަށް އައްޔަންކޮށްފައިވަނީ މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޑިރެކްޓަރުންގެ ބޯޑުގެ އެގްޒެކްޓިވް މެންބަރުކަމުގެ މަޤާމުން އިބްރާހިމް ޒިޔަތު ވަކިކުރުމަށްފަހުގައެވެ.

Ad by Hajj Corporation

މުޙައްމަދު ލަމްޢާން އެންމެ ފަހުން އަދާކުރެއްވީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) ގެ ޑެޕިއުޓީ މެނޭޖިންގ ޑިރެކްޓަރުގެ މަޤާމެވެ. އެ މަޤާމުގައި ހުންނަވައިގެން، ރާއްޖޭގެ އުމްރާނީ ތަރައްޤީގެ އެންމެ މުހިންމު އެއް މުއައްސަސާގެ އޮޕަރޭޝަންތައް ބެލެހެއްޓުމާއި ހިންގުން ހަރުދަނާކުރުމުގައި އޭނާ ވަނީ އިސް ދައުރެއް އަދާކުރައްވާފައެވެ.

މީގެ އިތުރުން ސަރުކާރު ހިއްސާވާ އެކި މުހިންމު ކުންފުނިތަކުގެ އިސް މަޤާމުތައް ވެސް ލަމްޢާން ވަނީ ފުރުއްވާފައެވެ. އޭގެ ތެރޭގައި ފެނަކަ ކޯޕަރޭޝަންގެ މެނޭޖިންގ ޑިރެކްޓަރުގެ މަޤާމާއި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ޗީފް ހިއުމަން ރިސޯސް އޮފިސަރުގެ މަޤާމާއި، ޗީފް ޕްރޮކިއުމަންޓް އޮފިސަރުގެ މަޤާމު ހިމެނެ އެވެ. މި މަޤާމުތަކުގައި ހުންނަވައިގެން އެ ކުންފުނިތަކުގެ ހިންގުމުގެ ނިޒާމު ހަރުދަނާކުރުމަށް ގިނަގުނަ ޚިދުމަތްތަކެއް އޭނާ ކޮށްދެއްވާފައިވެއެވެ.

ލަމްޢާން ވަނީ ޔުނިވަރސިޓީ އޮފް ކޮލަމްބޯއިން މާސްޓަރ އޮފް ބިޒްނަސް އެޑްމިނިސްޓްރޭޝަން (އެމް.ބީ.އޭ) ހާސިލުކުރައްވާފައެވެ. އަދި މެނޭޖްމަންޓާއި ލީޑަރޝިޕްގެ ދާއިރާއިން ރާއްޖެއާއި ރާއްޖޭއިން ބޭރުގެ ގިނަ އަދަދެއްގެ ފަންނީ ތަމްރީނު ޕްރޮގްރާމުތައް ވެސް އޭނާ ވަނީ ފުރިހަމަކުރައްވާފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެމް.ޕީ.އެލްގެ ބޯޑަށް ގެންނެވި މި ބަދަލާއެކު، އެ ކުންފުނީގެ ހިންގުން އިތުރަށް ހަރުދަނާވެ، ރާއްޖޭގެ ބަނދަރުތަކުގެ ޚިދުމަތްތަކަށް ބޮޑެތި ކުރިއެރުންތަކެއް ލިބިގެންދާނެ ކަމަށް ބެލެވެ އެވެ.