ވެރިކަން ކުރާ މައި ޕާޓީ، ޕީޕަލްސް ނެޝިނަލް ކޮންގްރެސް (ޕީއެންސީ) ގެ ސްޕޯކްސްޕާސަންގެ މަޤާމަށް އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލް އައްޔަނުކޮށްފިއެވެ.

ޕީއެންސީން މިކަން ހާމަކޮށްފައިވަނީ އެ ޕާޓީގެ ރަސްމީ 'އެކްސް' އެކައުންޓުން ކުރި ޕޯސްޓެއްގައެވެ. އެ ޕޯސްޓުގައި ފިރުޒުލްއަށް މަރުޙަބާ ދަންނަވަމުން ބުނެފައިވަނީ، "އެމަނިކުފާނަށް އިޚްލާޞްތެރި ތަހުނިޔާއާއި މަރުޙަބާއެއް ދަންނަވަން" ކަމަށެވެ.

Ad by Hajj Corporation

ފިރުޒުލް މި މަޤާމަށް އައްޔަނުކުރެއްވުމާ ގުޅިގެން އެ ޕާޓީގެ އެކި ފަންތީގެ ބޭފުޅުން ވެސް އަންނަނީ އޭނާއަށް މަރުޙަބާ ކިޔަމުންނެވެ.

ފިރުޒުލް އަކީ މިހާރު ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އޮފީހުގެ އަންޑަ ސެކްރެޓަރީގެ މަޤާމު ފުރުއްވަމުން ގެންދަވާ ބޭފުޅެކެވެ. މީގެ އިތުރުން، ރައީސް ޑރ. މުޙައްމަދު މުޢިއްޒު އިންތިޚާބީ ރައީސެއްގެ ގޮތުގައި ހުންނެވި ދުވަސްވަރު، އެމަނިކުފާނުގެ ފަރާތްޕުޅުން މީޑިއާތަކަށް މަޢުލޫމާތު ދެއްވުމުގައި ތަރުޖަމާނެއްގެ ގޮތުން އެންމެ އިސްކޮށް މަސައްކަތް ކުރެއްވީ ވެސް ފިރުޒުލްއެވެ.

އޭނާ ވަނީ މީގެ ކުރިން ބޭއްވުނު ލޯކަލް ކައުންސިލް އިންތިޚާބުގެ ކެމްޕޭން ތެރޭގައި ވެސް ކޮންގްރެސް ޕާޓީގެ ތަރުޖަމާނެއްގެ ގޮތުގައި ވަރަށް ހަރަކާތްތެރި ދައުރެއް އަދާކުރައްވާފައެވެ.