31 ދުވަހުގެ ތެރޭގައި ށ. މިލަންދޫ އެއަރޕޯޓު ތަރައްްގީއަށް ބޭނުންވާ ބިން ހިއްކާ ނިންމައިފިއެވެ.

މިކަން ހާމަކުރައްވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި ޕޯސްޓެއްގައެވެ.

Ad by Hajj Corporation

އެކްސްގައި ކުރެއްވި އެ ޕޯސްޓުގައި މި މަޝްރޫއުގެ ބިން ހިއްކުމުގެ މަސައްކަތް ފެށީ މި އަހަރުގެ އެޕްރީލް ތިނެއްގައި ކަމަށާއި މެއި ހަތަރެއްގައި އެ މަސައްކަތް ވަނީ ސައްތައިން ސައްތަ ފުރިހަމަކޮށްފައިކަން ހާމަކުރައްވާފައި ވެއެވެ. އަދި މި މަޝްރޫޢުގެ ދަށުން ޖުމުލަ 21 ހެކްޓަރުގެ ބިން ހިއްކައިފައިވާ ކަމަށް ވެސް ވަނީ ވިދާޅުވެފައެވެ.

މީގެއިތުރުން ޖުމުލަ ޕްރޮޖެކްޓް ސަރަޙައްދުގެ ބޮޑުމިނަކީ 25.90 ހެކްޓަރ ކަމަށާއި ރަށުގެ ކުރީގެ ބިމުން 4.9 ހެކްޓަރުގެ ސަރަޙައްދަކުން ގަސް ނަގާފައިވާ ކަމަށް ވެސް އެ ޕޯސްޓުގައި ވެއެެވެ. އަދި ބިން ހިއްކުމަށް ޖުމުލަ 1،134،534 ކިއުބިކް މީޓަރުގެ ވެލި ބޭނުންކޮށްފައިވާކަން ފާޙަގަކުރެއްވިއެވެ.

މި މަސައްކަތުގައި ބޭނުންކޮށްފައިވަނީ 35،000 ކިއުބިކް މީޓަރުގެ ކެޕޭސިޓީގެ "ކުއީން އޮފް ދަ ނެދަލެންޑްސް" ޑްރެޖަރެވެ.