ކުޑަކުދިންގެ ދުވަސް ކުލަގަދަކޮށް ފާހަގަކުރުމުގެ ގޮތުން ފަހި ދިރިއުޅުން ކޯޕަރޭޝަން (އެފްޑީސީ) އިން އިންތިޒާމުކުރާ ޚާއްސަ ކުޑަކުދިންގެ ހަވީރެއް ބޭއްވުމަށް އެ ކޯޕަރޭޝަނުން ނިންމައިފިއެވެ.

އެފްޑީސީން އެކްސްގައި ކުރި ޕޯސްޓެއްގައި ބުނިގޮތުގައި، މި ހަރަކާތަކީ 2026 ވަނަ އަހަރުގެ ކުޑަކުދިންގެ ދުވަސް ފާހަގަކުރުމުގެ ގޮތުން ކުރިއަށް ގެންދާ ހަރަކާތެކެވެ. މި ހަވީރު ޚާއްސަކޮށްފައިވަނީ އެފްޑީސީގެ "އަމާން ޓަވަރު" ތަކުގައި މިހާރު ދިރިއުޅެމުންދާ އެންމެހާ ރައްޔިތުންނަށެވެ. އެ ކޯޕަރޭޝަނުން ވަނީ މި އުފާވެރި ހަރަކާތުގައި ބައިވެރިވުމަށް ޓަވަރުތަކުގެ ހުރިހާ ރައްޔިތުންނަށް ދައުވަތު އަރުވާފައެވެ.

Ad by Hajj Corporation

އެފްޑީސީން ބުނީ މި ހަރަކާތް ބޭއްވުމުގެ އެންމެ މުހިންމު އެއް މަޤްސަދަކީ އަމާން ޓަވަރުތަކުގައި ދިރިއުޅޭ އާއިލާތަކާއި ރައްޔިތުންގެ މެދުގައި އޮންނަ އިޖުތިމާޢީ ގުޅުން ބަދަހިކުރުން ކަމަށެވެ. އަދި މީގެ އިތުރުން، މި ހަވީރުގައި އެފްޑީސީން ބަހައްޓާ ޚާއްސަ ސްޓޯލްތަކުން، ޓަވަރުތަކުގެ ދިރިއުޅުމާ ގުޅޭ މުހިންމު މަޢުލޫމާތުތައް ރައްޔިތުންނަށް ފޯރުކޮށްދިނުމަކީވެސް އެ ކޯޕަރޭޝަންގެ އަމާޒެކެވެ.

މި ކުލަގަދަ ހަވީރުގައި އެފްޑީސީގެ އިތުރުން ދައުލަތުގެ ބައެއް ކުންފުނިތަކާއި މުއައްސަސާތަކުން ބައިވެރިވުމަށް ވަނީ ހަމަޖެހިފައެވެ. އޭގެ ތެރޭގައި ވެމްކޯ، އެމްޑަބްލިއުއެސްސީ، ދިރާގު، އުރީދޫ އަދި ބީސީސީ ހިމެނެއެވެ. މި ކުންފުނިތަކުގެ ބައިވެރިވުމާއެކު ކުޑަކުދިންނަށް ގިނަ ކުޅިވަރުތަކަކާއި މުނިފޫހިފިލުވުމުގެ ހަރަކާތްތަކެއް މި ހަވީރުގައި ފެނިގެންދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރައްޔިތުންނަށް ފޯރުކޮށްދޭ ބޯހިޔާވަހިކަމުގެ މަޝްރޫޢުތަކުގެ ދަށުން ބިނާކޮށްފައިވާ މި ޓަވަރުތަކަކީ، އެކުވެރި އަދި އަމާން މުޖުތަމަޢެއް ބިނާކުރުމަށް އިސްކަންދީގެން ހިންގާ މަޝްރޫޢުތަކެކެވެ. އެފްޑީސީން ބާއްވާ މިފަދަ ހަރަކާތްތަކުގެ ސަބަބުން އަވަށްޓެރިންގެ މެދުގައި އޮންނަ އެކުވެރިކަން އިތުރުވެ، ކުޑަކުދިންނަށް ރައްކާތެރި އަދި އުފާވެރި މާހައުލެއް ބިނާވެގެންދާނެ ކަމަށް އެ ކޯޕަރޭޝަނުން އުންމީދު ކުރެއެވެ.

ކުޑަކުދިންގެ ދުވަހަކީ މެއި މަހުގެ 10ވަނަ ދުވަހެވެ.