އުސް އިމާރާތްތަކުން ކުޑަކުދިން ވެއްޓޭ ހާދިސާތައް އިތުރުވުމާ ގުޅިގެން، ފަހި ދިރިއުޅުން ކޯޕަރޭޝަން (އެފްޑީސީ) ގެ ޓަވަރުތަކުގައި ކުޑަކުދިންނާއި ޚާއްސަ އެހީއަށް ބޭނުންވާ މީހުން އުޅޭ ޔުނިޓުތައް ފާހަގަކޮށް ރައްކާތެރިކަމުގެ ފިޔަވަޅުއެޅުމަށް މަޝްވަރާ ފަށާފައިވާކަމަށް އެ ކުންފުނީގެ މެނޭޖިންގ ޑިރެކްޓަރ ހަމްދާން ޝަކީލް ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، "އަމާން އުދަރެސް" އަދި "އަމާން ދޯދި" ޓަވަރުތަކުގައި މިފަދަ ފަރާތްތައް ދިރިއުޅޭ ޔުނިޓުތައް ފާހަގަކުރުމާއި ސަލާމަތީ ފިޔަވަޅުތައް އެޅުމުގެ މަޝްވަރާތައް ވަނީ ފަށާފައެވެ. އަދި ޓަވަރުތަކުގައި ދިރިއުޅޭ އެންމެހައި ފަރާތްތަކުގެ ރައްކާތެރިކަން ކަށަވަރުކުރުމަށްޓަކައި، އެންމެ ބޮޑަށް އިސްކަންދޭންޖެހޭ ޔުނިޓުތަކަށް ޚާއްސަ ސަމާލުކަމެއްދީގެން އިންތިޒާމުތައް ހަމަޖެއްސުމަށް ވަނީ ނިންމާފައެވެ.

Ad by Hajj Corporation

ފްލެޓުތަކުން ކުޑަކުދިން ވެއްޓުމުގެ މައްސަލަތައް އިތުރުވެފައިވާއިރު، ސްޓެލްކޯ ފްލެޓަކުން 2 އަހަރުގެ ކުއްޖަކު ވެއްޓި ނިޔާވެފައިވުމާއި، އަމާން އުދަރެސް ޓަވަރަކުން 16 އަހަރުގެ ކުއްޖަކު ވެއްޓި ބޮޑެތި އަނިޔާތަކެއް ލިބިފައިވާކަން ފާހަގަކުރެވެއެވެ. މިފަދަ ނުރައްކާތެރި އެކްސިޑެންޓުތަކުން ކުދިން ސަލާމަތްކުރުމަށްޓަކައި، އުސް އިމާރާތްތަކުގެ ކުޑަދޮރު، ބެލްކަނި، އަދި ރެއިލިންގ ފަދަ ތަންތަނުގެ ސަލާމަތީ ކަންކަން ކަށަވަރުކުރުމަށް ރައީސުލްޖުމްހޫރިއްޔާ ވަނީ ގޮވާލައްވާފައެވެ.

އަދި މިއީ މުޅި މުޖުތަމައު ގުޅިގެން ކުރަންޖެހޭ ޤައުމީ އަދި އިންސާނީ މަސައްކަތެއްކަން ފާހަގަކުރައްވައި، ނުކުޅެދުންތެރިކަން ހުންނަ ފަރާތްތަކާއި ތުއްތު ކުދިން ބެލެހެއްޓުމުގައި ޢާއިލާތަކާއި އިމާރާތްތައް ބަލަހައްޓާ ފަރާތްތަކުން ޒިންމާދާރުވުމަށް އެމަނިކުފާނު ވަނީ އިލްތިމާސްކުރައްވާފައެވެ.