މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރަސްމީ ވެބްސައިޓަށް ދިމާވި ޓެކްނިކަލް މައްސަލަތައް ހައްލުކޮށް، އަލުން އާންމު ހާލަތަށް ގެނެސްފިއެވެ.

މަރުކަޒީ ބޭންކުން މިއަދު އެކްސްގައި ކުރި ޕޯސްޓެއްގައި ބުނީ، އެމް.އެމް.އޭގެ ރަސްމީ ވެބްސައިޓަށް ދިމާވި ޓެކްނިކަލް މައްސަލަ މިހާރު ހައްލުކުރެވި، ވެބްސައިޓް އާންމު ހާލަތަށް ގެނެވިފައިވާ ކަމަށެވެ. މި މައްސަލައާ ގުޅިގެން ވެބްސައިޓުގެ ޚިދުމަތްތައް މެދުކެނޑިފައި އޮތުމަށްފަހު، މިހާރު ވެބްސައިޓް މެދުވެރިކޮށް ބޭނުންވާ މައުލޫމާތުތައް ލިބޭނެއެވެ.

Ad by Hajj Corporation

އެމްއެމްއޭ އިން ބުނީ މި ހާދިސާ ހިނގަން މެދުވެރިވި ސަބަބުތައް އިތުރަށް ދެނެގަތުމުގެ މަސައްކަތް މިހާރު ކުރަމުންދާ ކަމަށެވެ. އަދި ކުރިއަށް އޮތް ތަނުގައި މިފަދަ ކަމެއް ތަކުރާރުވިޔަ ނުދިނުމަށްޓަކައި އަޅަންޖެހޭ ސަލާމަތީ ފިޔަވަޅުތައް ވަރުގަދަކުރުމުގެ މަސައްކަތް، ޚިދުމަތްދޭ ފަރާތާ ގުޅިގެން ކުރަމުންދާ ކަމަށްވެސް އެ އިދާރާއިން ހާމަކުރިއެވެ.

ވެބްސައިޓް ޑައުންވާން މެދުވެރިވި ސީދާ ސަބަބެއް އެމްއެމްއޭ އިން ހާމަކޮށްފައެއް ނުވެއެވެ. އެހެންނަމަވެސް، ސަލާމަތީ ކަންކަން އިތުރަށް ހަރުދަނާކުރުމަށް އެ އިދާރާއިން ދަނީ އިސްކަންދެމުންނެވެ.

ދައުލަތުގެ މަރުކަޒީ ބޭންކުގެ ހައިސިއްޔަތުން، އެމްއެމްއޭގެ ވެބްސައިޓަކީ މާލީ އަދި އިގްތިސާދީ ގިނަ މައުލޫމާތުތަކެއް އާންމުންނަށް ފޯރުކޮށްދޭ މުހިންމު ވަސީލަތެކެވެ.