ކަރެކްޝަނަލް ސާވިސްގެ އެސިސްޓެންޓް ކޮމިޝަނަރު މުހައްމަދު އާސިފް މަގާމުން ވަކިކުރީ ގޯސްކޮށް ކަމަށް ކަނޑައަޅައި، އޭނާއަށް އަލުން ވަޒީފާ ދިނުމަށް ސިވިލް ކޯޓުން އިއްޔެ ދައުލަތުގެ މައްޗަށް އަމުރުކޮށްފިއެވެ. ވަޒީފާއިން ވަކިކޮށްފައި ހުރި މުއްދަތުގެ މުސާރަ ވެސް ދޭން ޖެހޭނެ ކަމަށް ހުކުމުގައި ވެއެވެ.

މި މައްސަލައިގެ ފެށުމަކީ ކަރެކްޝަންސްގެ ޕްރިޒަންސް ކްލަބުގެ އެކައުންޓުން ދެ ލައްކައަށް ވުރެ ގިނަ ރުފިޔާ އެކި އެކައުންޓުތަކަށް ޖަމާކުރި ކަމުގެ ތުހުމަތެވެ. އެ ކްލަބުގެ ރައީސްކަން ކުރެއްވި އާސިފާ ދެކޮޅަށް ހިޔާނާތުގެ ތުހުމަތުތައް ފެންމަތިކޮށް، މުވައްޒަފުން ވަނީ ކޮމިޝަނަރު އޮފް ޕްރިޒަންސް ހަސަން ޒަރީރަށް ޕެޓިޝަނެއް ވެސް ހުށަހަޅައިފައެވެ. އެ ތުހުމަތުތަކާ ގުޅިގެން މުސާރަ ލިބޭ ގޮތަށް އަށް މަސް ދުވަހު ސަސްޕެންޝަނުގައި ބެހެއްޓުމަށް ފަހު، މިދިޔަ އަހަރުގެ ޖުލައި މަހު އާސިފް ވަކިކުރީއެވެ.

Ad by Hajj Corporation

ނަމަވެސް އެ ނިންމުން ގަބޫލުނުކޮށް، އާސިފް ދައުލަތާ ދެކޮޅަށް ސިވިލް ކޯޓަށް މައްސަލަ ހުށަހެޅުއްވިއެވެ. މައްސަލަ ބެލެމުން ދިޔައިރު، އެ މަގާމަށް އެހެން މީހަކު އައްޔަން ނުކުރުމަށް ކޯޓުން އޮތީ ވަގުތީ އަމުރެއް ވެސް ނެރެފައެވެ. އިއްޔެގެ ހުކުމާ އެކު، ސަސްޕެންޝަނާއި ވަކިކުރުމުގެ ދިގު ދަތުރަށް ފަހު އާސިފަށް ވަނީ މަގާމު އަނބުރާ ލިބިފައެވެ.