ރާއްޖޭގައި ނޫސްވެރިކަމުގެ މިނިވަންކަން ނެތް ކަމަށް ބުނުމުގެ އެއްވެސް ޖާގައެއް ނެތް ކަމަށާއި، ނޫސްވެރިކަމުގެ މިނިވަންކަން މިހާރު އޮތީ "ތައްމިނަށް" ހުޅުވާލެވިފައި ކަމަށް ވެރިކަންކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޕާލަމެންޓަރީ ގްރޫޕްގެ ޑެޕިއުޓީ ލީޑަރު، ވިލިމާލޭ ދާއިރާގެ މެމްބަރު މުހައްމަދު އިސްމާއީލް ވިދާޅުވެއްޖެއެވެ.

ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓްތަކެއްގައި މުހައްމަދު އިސްމާއީލް ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހަފްތާއަކު އެއްދުވަހު ނޫސްވެރިންނާ ބައްދަލުކުރައްވައި، ކުރަން ބޭނުންވާ ހުރިހާ ސުވާލެއް ކުރުމުގެ ފުރުސަތު އިމެއްނެތި ދެއްވަމުން ގެންދަވާ ކަމަށެވެ. މިއީ މުޅި ރާއްޖެއަށް ފެންނަން އޮތް ހަގީގަތެއް ކަމަށް އޭނާ ފާހަގަކުރެއްވިއެވެ.

Ad by Hajj Corporation

ކުރީގެ ވެރިންނަށް ފާޑުވިދާޅުވަމުން މުހައްމަދު އިސްމާއީލް ވިދާޅުވީ، ކުރީގެ ރައީސުން ކަމަށްވާ އިބްރާހީމް މުހައްމަދު ސޯލިހާއި، މުހައްމަދު ނަޝީދާއި، އަބްދުﷲ ޔާމީން އަދި ޑރ. މުހައްމަދު ވަހީދު ވެރިކަން ނިންމަވާލެއްވީ ނޫސްވެރިންނަށް ފިއްލަވައިގެން ތިއްބަވައިގެން ކަމަށެވެ. އަދި އެމްޑީޕީން ވެރިކަމުގެ ތަހުތު ހޯދުމަށްޓަކައި ހީލަތްތެރި ރޭވުންތައް ރާވަމުންދާ ކަމަށްވެސް އޭނާ ތުހުމަތު ކުރެއްވިއެވެ.

ނޫސްވެރިކަމުގެ މިންގަނޑުތަކާ ގުޅޭގޮތުން ވާހަކަދައްކަވަމުން އޭނާ ވިދާޅުވީ، ނޫސްވެރިކަމަކީ ހިތުހުރި ގޮތަކަށް، ދޮގުތެދު ބެލުމެއްނެތް ގޮތުގައި މީހުންނާ ދިމާލަށް އެއްޗެހި ގޮވުން ނޫން ކަމަށެވެ. 

"ކޯޓުން އަމުރެއްގައި ވަކިކަމެއް ނުކުރުމަށް އަމުރުކޮށްފައި އޮއްވާ، އެ އަމުރަކާ ހިލާފުވުމަކީ ކުށެއްކަން ނޫސްވެރިންނަށް ނޭގޭނެތަ؟" މުހައްމަދު އިސްމާއީލް ސުވާލު ކުރެއްވިއެވެ.

މީގެ އިތުރުން، ގާނޫނުއަސާސީން ކަށަވަރުކޮށްދީފައިވާ އަނެކާގެ ހައްގުތަކަށް އިހުތިރާމް ކުރަންޖެހޭނެ ކަމަށާއި، މިހާރު އިދިކޮޅު ފަރާތްތަކުން ދައްކަމުންދާ ވާހަކަތަކަކީ ގާނޫނީ އަދި ދުސްތޫރީ ހަމަތަކުން ދައްކާ ވާހަކަތަކެއް ނޫން ކަމަށްވެސް އޭނާ ވިދާޅުވިއެވެ.

ނޮވެމްބަރު 3 ގެ ހާދިސާއަށް އިޝާރާތް ކުރައްވައި، އެ ދުވަހު އިސްކޮށް ތިބީ ކޮންބައެއްތޯ ސުވާލު އުފައްދަވައި، ރައްޔިތުން މިކަންކަމާ މެދު ވިސްނާ ފިކުރު ކުރުމަށް އޭނާ ގޮވާލެއްވިއެވެ.