ދިވެހީންނަށް ދިވެހީންގެ ގޮތުގައި ތިބުމުގެ އެންމެ ބޮޑު ސަބަބަކީ އަޅުގަނޑުމެންގެ އަމިއްލަ މާދަރީ ބަސް ކަމަށް ފަންނާއި، ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ޕީ.އެސް.އެމް ނިއުސްގެ "ރާއްޖެ މިއަދު" ޕްރޮގުރާމުގައި ބައިވެރިވެވަޑައިގެން ދެއްކެވި ވާހަކަފުޅުގައެވެ. ވަޒީރު ފާހަގަކުރެއްވި ގޮތުގައި ދިވެހިރާއްޖެއަކީ ދުނިޔޭގެ ނިސްބަތުން ކިތަންމެ ކުޑަ ޤައުމެއް ނަމަވެސް، އަޅުގަނޑުމެންނަކީ ވަކި ބަހަކުން ވާހަކަދައްކާ، އަދި އަމިއްލަ އަކުރަކުން ލިޔާ ފަޚުރުވެރި ބަޔަކަށް ވުމީ ދިވެހި އަމިއްލަވަންތަކަމުގެ އެންމެ ވަރުގަދަ ތަނބެވެ.

Ad by Hajj Corporation

މީގެ އިތުރުން، ރާއްޖޭގެ އެކި އަތޮޅުތަކުގައި ތަފާތު ގިނަ ބަހުރުވަތަކުން ވާހަކަދެއްކުމަކީ ދިވެހިބަހުގެ މުއްސަނދިކަން ހާމަކޮށްދޭ ކަމެއްކަން ވަޒީރު ފާހަގަކުރެއްވިއެވެ. މި މުއްސަނދިކަމާއެކު، ދިވެހިބަހަކީ ދިވެހީންގެ މެދުގައި އޮންނަ އެއްބައިވަންތަކަމާއި ގުޅުން ދަމަހައްޓައިދޭ މައިގަނޑު ވަސީލަތް ކަމަށްވެސް އެކަމަނާ ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ދިވެހިބަހާއި، ސަގާފަތާއި ތަރިކަ ރައްކާތެރިކުރުމަށް ޚާއްޞަ އިސްކަމެއް ދެއްވައިގެން ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކޮށްލެވެއެވެ. ވަޒީރު ހީނާ ވަލީދު އިތުރަށް ވިދާޅުވީ، ދިވެހިބަހަކީ އަޅުގަނޑުމެންގެ އައިޑެންޓިޓީ ނުވަތަ އަމިއްލަވަންތަކަން ކަމަށްވާއިރު، އެ ބަސް އަންނާން އޮތް ޖީލުތަކަށް ފޯރުކޮށްދިނުމަކީ ކޮންމެ ދިވެއްސެއްގެ ޒިންމާއެއް ކަމަށެވެ.