މިއަހަރުގެ މިނިވަންދުވަހުގެ މުނާސަބަތުގައި ބޭއްވި ހަރަކާތްތަކަށް ހިނގީ ޖުމްލަ 4.1 މިލިއަން ރުފިޔާ ކަމަށް ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެ އެވެ.

މިނިސްޓަރު މި މަޢުލޫމާތު ހިއްސާކުރެއްވީ ރައްޔިތުންގެ މަޖިލީހުގެ މިއަދުގެ ޖަލްސާގައި، ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ކުރެއްވި ސުވާލަކަށް ޖަވާބުދެއްވަމުންނެވެ. މެންބަރުސުވާލު ކުރައްވާފައިވަނީ ދިވެހިރާއްޖޭގެ މިނިވަންކަމަށް 60 އަހަރު ފުރުމުގެ މުނާސަބަތު ފާހަގަކުރުމަށް މިނިސްޓްރީން ހިންގި ހަރަކާތްތަކަށް ޖުމްލަ ހަރަދުވީ މިންވަރާއި، އެ ހަރަދުތަކުގެ ތަފްސީލު ހޯދުމަށެވެ. މީގެ އިތުރުން، މިނިވަން ދުވަހުގެ ހަރަކާތްތަކަށް މާލެ ފިޔަވައި އަތޮޅުތެރޭގެ ރަށްތަކުގައި ކުރި ހަރަދުތަކުގެ ތަފްސީލު ވަކިން އެނގޭނޭހެން ހާމަކުރުމަށްވެސް މެންބަރު އެދިވަޑައިގެންފައިވެ އެވެ.

Ad by Hajj Corporation

މެންބަރުގެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ، ދިވެހިރާއްޖޭގެ މިނިވަންކަމަށް 60 އަހަރު ފުރުނު މުނާސަބާ ފާހަގަކުރުމަށް އެ ވުޒާރާއިން ހިންގި ހަރަކާތްތަކަށް ހަރަދުވެފައިވަނީ ޖުމްލަ 4.1 މިލިއަން ރުފިޔާ ކަމަށެވެ.

އަދި މާލެ ފިޔަވައި އަތޮޅުތެރޭގެ އެއްވެސް ރަށެއްގައި މި ދުވަހުގެ މުނާސަބަތުގައި އެ މިނިސްޓްރީން އެއްވެސް ހަރަކާތެއް ހިންގާފައި ނުވާނެ ކަމަށްވެސް މިނިސްޓަރު ވިދާޅުވި އެވެ.

ނިމިދިޔަ އަހަރުގެ މިނިވަން ދުވަސް ފާހަގަކުރުމުގެ ގޮތުން، ފުޅަނދުބުރާ އެކު މާލޭގައި ކުލަގަދަ ގިނަ ހަރަކާތްތަކެއް ވަނީ ކުރިއަށް ގެންގޮސްފައެވެ. ކޮންމެ އަހަރެއްގެ ވެސް ޖުލައި މަހުގެ 26 ވަނަ ދުވަހަކީ ދިވެހިރާއްޖޭގެ މިނިވަން ދުވަހުގެ ގޮތުގައި ފާހަގަކުރާ ރަސްމީ ދުވަހެވެ.