ޕީއެންސީން ރޭ ބޭއްވި ޖަލްސާއެއްގައި ކުރީގެ ރައީސް އަބްދުﷲ ޔާމީންގެ ވެރިކަމަށް ވަރުގަދަ ރައްދެއް ދެއްވައި، ކިތަންމެ ވަރަކަށް ތަރައްގީކުރިޔަސް އެ ދައުރުގައި ގައުމުގައި އޮތީ ކޮރަޕްޝަނާއި އަނިޔާވެރިކަން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް ވިދާޅުވީ ކުރީގައި ވެގެންދިޔަ ކަންކަމަކީ ނުވާ ކަމެއްގެ ގޮތުގައި ނުހެދޭނެ ކަމަށާއި މާޒީގެ ސަފުހާތައް ނިއުޅާލައި ބަލާލުމުން ވެރިކަން ކުރެއްވި ބޭފުޅުންގެ ހަގީގަތް ހުރީ ފެންނަން ކަމަށެވެ. މީގެ ކުރިން މީހަކު ކިރިޔާ އެއްޗެއް ބުނާއިރަށް ޖަލަށްލީ ދުވަސް ވެސް ދިޔަ ކަމަށް އެ މަނިކުފާނު ވިދާޅުވިއެވެ.

"ތަރައްގީގެ މަޝްރޫއުތައް ވަރަށް ގިނައިން ހިންގި، އަޅުގަނޑު މިއީ އޭގެ އެންމެ ބޮޑު ޒިންމާއެއް ހަވާލުކޮށްފައި ހުރި އެކަކު. ދެން މިތާ އެބަތިބި ބައެއް ވަޒީރުން އެ ޒިންމާގައި ބައިވަރު އިހުލާސްތެރި މަސައްކަތްކުރެއްވި. އެކަމަކު ތަރައްގީކުރިޔަސް، ގައުމުގައި އޮތީ ކޮރަޕްޝަނާއި އަނިޔާވެރިކަން. ސިޔާސީ ހުރިހާ އެންމެން ޖަލުގައި. އެއީ ގައުމުވެސް ފެންނަން ހުރި ހަގީގަތް. އެހެންވީމާ ޓްރެކް ރެކޯޑު މިއޮތީ ވަރަށް ސާފުކޮށް ޑިސްޕްލޭ ވެފައި،" ރައީސް ވިދާޅުވިއެވެ.

ކޮރަޕްޝަނާ ދެކޮޅަށް މަސައްކަތްކުރަން މި ސަރުކާރު އޮތީ ވަރަށް އެކުވެރިކަމާއެކު، ވަރަށް ބަދަހިކަމާއެކު ކަމަށް ރައީސް ވިދާޅުވިއެވެ. ކޮރަޕްޝަންގެ އަމަލު ހިންގަން ހިތަށް އަރާ ބޭފުޅަކު ވިޔަސް، ގާތުގައި ބަސްކިޔަން ހުންނަވަން ހައްދަވާނެ ކަމެއް ނެތް ކަމަށް ވެސް އެ މަނިކުފާނު ވިދާޅުވިއެވެ.