ވ. އަތޮޅުގައި އިއްޔެ ހިނގި ހިތާމަވެރި ޑައިވިން ހާދިސާއާ ގުޅިގެން، އިޓަލީގެ ރައީސް ސާޖިއޯ މަޓަރެއްލާއަށާއި އެ ގައުމުގެ ރައްޔިތުންނަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ފުން ތަޢުޒިޔާއެއް ފޮނުއްވައިފިއެވެ.

މި ހާދިސާގެ ސަބަބުން ލިބުނު ފުން ހިތާމަ ފާޅުކުރައްވައި ރައީސް މުޢިއްޒު ފޮނުއްވި މެސެޖުގައި ވިދާޅުވީ، މި ހިތާމަވެރި ވަގުތުގައި ދިވެހި ސަރުކާރާއި ރައްޔިތުންގެ ހަމްދަރުދީ އޮތީ އިޓަލީގެ ރައްޔިތުންނާ އެކުގައި ކަމަށެވެ. މި ހާދިސާގައި މަރުވި އިޓަލީ ރައްޔިތާ އާއި، ގެއްލިފައިވާ ހަތަރު މީހުންގެ އިތުރުން މި ހާދިސާގައި އަސަރުކުރި ހުރިހާ އާއިލާތަކަށް ރައީސްގެ މެސެޖުގައި ކެތްތެރިކަން އެދިވަޑައިގެންފައިވެއެވެ.

Ad by Hajj Corporation

ރައީސުލްޖުމްހޫރިއްޔާ އިތުރަށް ވިދާޅުވީ، ގެއްލިފައިވާ ހަތަރު ޑައިވަރުން ހޯދުމުގެ މަސައްކަތަކީ މިވަގުތު ސަރުކާރުން އެންމެ އިސްކަމެއް ދީގެން ކުރަމުންދާ މަސައްކަތް ކަމަށެވެ. އަދި ގެއްލުނު މީހުން ހޯދުމަށްޓަކައި މިހާރު ކުރިއަށްދާ ވަރުގަދަ އޮޕަރޭޝަނުގައި އިޓަލީ ސަރުކާރުގެ ފަރާތުން ލިބެމުންދާ އެއްބާރުލުމާއި އެހީތެރިކަން ދިވެހި ސަރުކާރުން ބަލައިގަންނަކަން އެމަނިކުފާނު ފާހަގަކުރެއްވިއެވެ.

ވ. އަތޮޅުގައި ހިނގި މި ހާދިސާގައި ގެއްލުނު މީހުން ހޯދުމުގެ މަސައްކަތް ކަމާބެހޭ ފަރާތްތަކުން ހުއްޓުމެއް ނެތި އަންނަނީ ކުރަމުންނެވެ.