ދިވެހިރާއްޖެއާއި އިންޑިއާއާ ދެމެދު އޮތް ސިޔާސީ ގުޅުމަށް 60 އަހަރު ފުރުން ފާހަގަކުރުމުގެ ގޮތުން ބޭއްވި ޚާއްސަ ސެމިނާރ އެއްގައި، ދެ ގައުމުގެ ގުޅުން އިތުރަށް ބަދަހިކޮށް، ގުޅިގެން ކުރިއަށްގެންދާނެ ކަންކަމާ ގުޅޭގޮތުން ފުޅާ ދާއިރާއެއްގައި މަޝްވަރާކޮށްފިއެވެ.

މި ސެމިނާރގައި ވޭތުވެދިޔަ ހަ އަހަރުދުވަހުގެ ތެރޭގައި ދެ ގައުމުގެ ދެމެދުގައި އޮތް ތާރީޚީ ގުޅުންތަކުގެ މައްޗަށް ފުންކޮށް ބަލާލައި، ތަފްސީލީ ދިރާސާތަކެއް ވަނީ ހުށަހަޅާފައެވެ. ސެމިނާރގެ ބައިވެރިން ވަނީ ދެ ގައުމުގެ ގުޅުމަކީ ހަމައެކަނި ވަކިވަކި ދާއިރާތަކަކަށް މަހްދޫދުވެފައިވާ ގުޅުމެއްގެ ބަދަލުގައި، މުޅި ގުޅުން އެކުލެވިގެންވާ ގޮތުގެ މައްޗަށް ބިނާކޮށް ފުރިހަމަ ތަސައްވުރެއް ހުށަހަޅައިދީފައެވެ.

Ad by Hajj Corporation

އެގޮތުން، ތިމާވެއްޓަށް އަންނަ ބަދަލުތަކާއި، ދެމެހެއްޓެނިވި ތަރައްގީއާއި، ދެ ގައުމުގެ ދެމެދުގައި އޮތް ތާރީޚީ އަދި ސަގާފީ ގުޅުންތަކުގެ މައްޗަށް މި ބައްދަލުވުމުގައި އަލިއަޅުވާލާފައިވެއެވެ. އަދި ސިއްހީ ދާއިރާއިން ދެ ގައުމު ގުޅިގެން ކުރަމުންދާ މަސައްކަތްތަކާ ގުޅޭގޮތުން ވެސް ފުޅާ ދާއިރާއެއްގައި މަޝްވަރާ ކުރެވުނެވެ.

މީގެ އިތުރުން، މި ސެމިނާރގެ ސެޝަންތަކުގައި އިގްތިސާދީ ކުރިއެރުމާއި، ވިޔަފާރިއާއި، ތައުލީމާއި އިންސާނީ ވަސީލަތްތައް ތަރައްގީކުރުމުގެ މުހިންމުކަމުގެ މައްޗަށް ވާހަކަދެކެވުނެވެ. އަދި ބައިނަލްއަގުވާމީ ގުޅުންތަކުގެ އިތުރުން އުމްރާނީ ތަރައްގީ ފަދަ ސްޓްރެޓެޖިކް ގޮތުން މުހިންމު ދާއިރާތަކާ ގުޅޭ ތަފްސީލީ މައުލޫމާތުތައް ބައިވެރިންނާ ހިއްސާކޮށްފައިވެއެވެ.

މި ރަސްމިއްޔާތުގެ ޝަރަފުވެރި މެހެމާނު، ހައި ކޮމިޝަނަރު ބާލަސުބްރަމާނިއަން ދެއްކެވި ވާހަކަފުޅުގައި، ދެ ގައުމުގެ ދެމެދުގައި އޮތް ގާތް އަދި ތާރީޚީ ގުޅުމުގެ މައްޗަށް އަލިއަޅުއްވާލެއްވިއެވެ. އޭނާ ފާހަގަކުރެއްވި ގޮތުގައި، މިފަދަ ހަރަކާތެއް ބޭއްވުމުގެ މައިގަނޑު މަގްސަދަކީ ދިވެހިރާއްޖެއާއި އިންޑިއާއާ ދެމެދު އޮތް 60 އަހަރުވީ ބަދަހި ޚާރިޖީ ގުޅުމާއި، އެ ގުޅުމުގެ ސަބަބުން ދެ ގައުމުގެ ރައްޔިތުންނަށް ލިބިފައިވާ ކުރިއެރުންތައް ފާހަގަކުރުމެވެ.