ފަރަންސޭސިވިލާތުގައި ކުރިއަށްދާ ޖީ7 ސަމިޓުގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާއެކު ބޭއްވި ބައްދަލުވުމަށްފަހު، އެމެރިކާގެ ރައީސް ޑޮނަލްޑް ޓްރަމްޕް އިންޑިއާއަށް ވަޑައިގަތުމަށް ވައުދުވެވަޑައިގެންފިއެވެ. މިއީ ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ކުޑަވެ، ގުޅުން ރަނގަޅުވަމުން އަންނަކަމުގެ ނިޝާނެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.

ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ ކުރިމަގުގައި އިންޑިއާއަށް ވަޑައިގަންނަވާނެ ކަމަށާއި، ދެ ގައުމުގެ ދެމެދުގައި ވިޔަފާރީގެ އެއްބަސްވުމަކަށް އައުމަށް ވަރަށް ބޮޑަށް ގާތްވެފައިވާ ކަމަށެވެ. މޯދީއަކީ "ވަރުގަދަ މަޝްވަރާވެރިއެއް" ގޮތުގައި ސިފަކުރައްވަމުން ޓްރަމްޕް ވިދާޅުވީ، އިންޑިއާއަށް އެހެން ގައުމަކުން ހަމަލާއެއް ދީފިނަމަ އެމެރިކާއިން އެހީތެރިވާނެ ކަމަށެވެ. "އެއްވެސް ބަޔަކު އެމަނިކުފާނަށް (މޯދީއަށް) ހަމަލާއެއް ދީފިނަމަ، އަޅުގަނޑުމެން އެތަނުގައި ތިބޭނަން،" ޓްރަމްޕް ވިދާޅުވިއެވެ.

Ad by Hajj Corporation

މި ބައްދަލުވުމުގައި ބޮޑުވަޒީރު މޯދީ ވަނީ ހޮރްމޫޒް ކަނޑުއޮޅީގައި މަސައްކަތްކުރާ އިންޑިއާގެ ފަޅުވެރިންގެ ސަލާމަތާ ގުޅޭގޮތުން ކަންބޮޑުވުން ފާޅުކުރައްވާފައެވެ. މިދިޔަ ހަފްތާގައި އޮމާން ކަނޑުގައި އެމެރިކާ ސިފައިން ދިން ހަމަލާއެއްގައި އިންޑިއާގެ ތިން ފަޅުވެރިއަކު މަރުވުމާ ގުޅިގެން ދެ ގައުމުގެ ގުޅުމަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. އެމެރިކާއިން ބުނާގޮތުގައި އެ ހަމަލާ އަމާޒުކުރީ އީރާނުގެ ބަނދަރުތަކަށް މުދާ އުފުލުމުގެ މަނާކުރުންތަކާ ހިލާފުވި ޓޭންކަރަކަށެވެ.

ވިޔަފާރީގެ ގޮތުން ބަލާއިރު، އިންޑިއާއިން އެކަށީގެންވާ މިންވަރަށް މަޖުބޫރު މަސައްކަތް (ފޯސްޑް ލޭބަރ) ހުއްޓުވުމަށް މަސައްކަތް ނުކުރާކަމަށް ބުނެ އެމެރިކާއިން އާ އިމްޕޯޓް ޓެކްސްތަކެއް ތައާރަފުކުރުމާ ގުޅިގެން މަޝްވަރާތަކަށް ވަނީ ހުރަސްތަކެއް އެޅިފައެވެ. އިންޑިއާގެ އިދިކޮޅު ޕާޓީތަކުން ވެސް ވަނީ އެމެރިކާގެ އަމަލުތައް ސީދާ ގޮތެއްގައި ކުށްވެރިނުކުރާތީ މޯދީއަށް ފާޑުކިޔުންތައް އަމާޒުކޮށްފައެވެ.

ޖީ7 ގެ ލީޑަރުންނާ މުހާތަބު ކުރައްވަމުން މޯދީ ވިދާޅުވީ، މިއަދު ދުނިޔެއަށް ދިމާވެފައިވަނީ ވަސީލަތްތަކުގެ ދަތިކަމެއް ނޫން ކަމަށާއި، އެއީ އިތުބާރު ނެތުމުގެ މައްސަލައެއް ކަމަށެވެ. އަދި މެދުއިރުމަތީގެ ހަމަނުޖެހުންތަކުގައި އިންޑިއާގެ އާންމުންގެ ފުރާނަ ގެއްލެމުންދާތީ، ކަނޑު ދަތުރުފަތުރުކުރާ ފަރާތްތަކުގެ ސަލާމަތްތެރިކަން ކަށަވަރުކުރަންޖެހޭ ކަމަށް އެމަނިކުފާނު ވިދާޅުވިއެވެ. އިންޑިއާއަކީ ބޭނުންވާ ތެލުގެ 90 އިންސައްތަ އިމްޕޯޓްކުރާ ގައުމަކަށްވުމުން، ހޮރްމޫޒް ކަނޑުއޮޅި ބަންދުވުމުގެ ނޭދެވޭ އަސަރު އެ ގައުމުގެ އިގްތިސާދަށް ވަރަށް ބޮޑަށް ކުރެއެވެ.