ދިވެހި ދައުލަތަށް 41 އަހަރަށްވުރެ ދިގު މުއްދަތަކަށް އަގުހުރި ޚިދުމަތްތަކެއް ކުރެއްވި، ފުވައްމުލައް ސިޓީ، މާދަނޑު، ސަމާ، ފާރޫޤް އަޙްމަދު އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އެޢާއިލާއަށް ތަޢުޒިޔާ ފޮނުއްވައިފިއެވެ.

ފާރޫޤް އަޙްމަދު އަވަހާރަވުމުގެ ހިތާމައިގައި ރައީސުލްޖުމްހޫރިއްޔާ މިއަދު ކުރެއްވި ސޯޝަލް މީޑިއާ މެސެޖެއްގައި، މަރްޙޫމްގެ ޢާއިލާއަށާއި ފުވައްމުލަކު ސިޓީގެ ރައްޔިތުންނަށް ވަނީ ފުން ހިތާމައާއެކު ތަޢުޒިޔާ ދަންނަވާފައެވެ. ރައީސްގެ މެސެޖުގައި ވިދާޅުވީ، ފާރޫޤް އަޙްމަދަކީ ދިވެހި ދައުލަތަށް ގިނަ ދުވަސްތަކެއް ވަންދެން އިޚްލާޞްތެރި ޚިދުމަތްތަކެއް ކުރެއްވި، ޚާއްޞަކޮށް ފުވައްމުލަކު އަތޮޅުވެރިކަމާއި އިދާރީ ހިންގުމުގެ އެކި މަޤާމުތަކުގައި ބޮޑެތި ޚިދުމަތްތަކެއް ކޮށްދެއްވި ބޭފުޅެއް ކަމަށެވެ.

Ad by Hajj Corporation

މީގެއިތުރުން، ފާރޫޤް އަޙްމަދަކީ ދިވެހި އަދަބިއްޔާތަށާއި، ދިވެހި ތާރީޚަށް ވެސް ގިނަގުނަ ޚިދުމަތްތަކެއް ކުރެއްވި ތަޖުރިބާކާރު އަގުހުރި ޝަޚްޞިއްޔަތެއްގެ ގޮތުގައި ރައީސުލްޖުމްހޫރިއްޔާ ސިފަކުރެއްވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ މަރްޙޫމް ފާރޫޤް އަޙްމަދަށް ސުވަރުގޭގެ ދާއިމީ ނިޢުމަތް ދެއްވައި، މާތްﷲގެ ތަނަވަސް ރަޙްމަތުގައި ލަހައްޓެވުން އެދި ދުޢާ ކުރައްވަމުންނެވެ.

ފާރޫޤް އަޙްމަދު ނިޔާވިއިރު އޭނާއަކީ ފުވައްމުލަކުގެ ތަރައްޤީއަށާއި، އެ ރަށުގެ އިޖުތިމާޢީ އަދި ސަގާފީ ދާއިރާއަށް ނުހަނު ބޮޑު މަސައްކަތްތަކެއް ކޮށްދެއްވާފައިވާ، ރައްޔިތުންގެ އިޙްތިރާމް ލިބިވަޑައިގެންފައިވާ ބޭފުޅެކެވެ.