އެމެރިކާގެ ރައީސް ޑޮނަލްޑް ޓްރަމްޕް، އަންގާރަ ދުވަހަށް ތާވަލުކުރި ހަމަލާތައް ފަސްކުރެއްވިކަން އިއުލާނު ކުރެއްވި ނަމަވެސް، މިއީ ވަގުތީ މަޑުޖެހުމެއްކަމަށް އިސްރާއީލުގެ މީޑިއާތަކާއި ދިފާއީ ދިރާސާވެރިން ބުނެފިއެވެ.

އިސްރާއީލުގެ އަސްކަރީ އަދި ޖާސޫސީ ދާއިރާތަކުގެ މެދުގައި މިހާރު އޮތް ބޮޑު ސުވާލަކީ ހަމަލާދޭނެތޯ ނޫން ކަމަށާއި، އެއީ "ކޮން އިރަކު" ދޭނެ ހަމަލާއެއްތޯ އޮތް ސުވާލު ކަމަށް ރިޕޯޓުތައް ބުނެއެވެ. އަދި ހަމަލާ ދޭނެކަމާމެދު ޝައްކެތް ނެތްކަމަށް ވެސް އިސްރާއީލްގެ މީޑިއާ އިން ވަނީ ބުނެފައެވެ.

Ad by Hajj Corporation

އެއްބަސްވުމަކަށް އައުމުގެ އުންމީދު ކުޑަވުން

ޓްރަމްޕް އުންމީދީ ވާހަކަތަކެއް ދެއްކެވި ނަމަވެސް، ޖާސޫސީ މާހިރުން ފާހަގަކުރާ ގޮތުގައި ދެފަރާތުގެ ޝަރުތުތައް ހުރީ އެއްބަސްވުމަކަށް އާދެވޭ ފަދަ ގޮތަކަށް ނޫނެވެ. އެމެރިކާ އާއި އިސްރާއީލުން ބޭނުންވަނީ އީރާނުން ފައްކާކޮށްފައިވާ 400 ކިލޯގްރާމްގެ ޔުރޭނިއަމް އެމެރިކާއާ ހަވާލުކުރުމަށާއި، އީރާނުގެ ނިއުކްލިއާ މަސައްކަތްތައް ހަމައެކަނި އެއް މަރުކަޒަކަށް މަދުކޮށް ބެލެހެއްޓުމަށެވެ. މީގެ އިތުރުން އީރާނުގެ ހިފަހައްޓާފައިވާ ފައިސާގެ ތެރެއިން ދޫކުރުމަށް ހުށަހަޅާފައިވަނީ އެންމެ 25 އިންސައްތައެވެ. މި ޝަރުތުތަކަކީ އީރާނުން ގަބޫލުކުރާނެ ކަންކަން ނޫން ކަމަށް ބެލެވޭތީ، ޕާކިސްތާނުން މެދުވެރިއެއްގެ ދައުރު އަދާކުރާ މަޝްވަރާތައް ނާކާމިޔާބުވާނެ ކަމަށް އިސްރާއީލުގެ މާހިރުން ލަފާކުރެއެވެ.

ޓްރަމްޕްގެ ކުރީގެ ސިޔާސަތުތައް

އިސްރާއީލުގެ ދިފާއީ ދާއިރާތަކުން ހަނދާންކޮށްދެނީ 2026 ވަނަ އަހަރުގެ ފެބްރުއަރީ މަހު ހިނގާދިޔަ ކަންކަމެވެ. އެ ފަހަރުވެސް ޓްރަމްޕް ފުރަތަމަ ވިދާޅުވީ ޑިޕްލޮމެޓިކް މަޝްވަރާތަކަށް ފުރުސަތު ދެއްވާނެ ކަމަށެވެ. ނަމަވެސް އޭގެ މަދު ދުވަސްކޮޅެއްގެ ތެރޭގައި އީރާނުގެ ނިޒާމަށް ބޮޑެތި ލޮޅުންތަކެއް އެރި ވަރުގަދަ ވައިގެ ހަމަލާތަކެއް ދިނުމަށް އަމުރުކުރެއްވިއެވެ. އެހެންކަމުން މިހާރުގެ މަޑުޖެހުމަކީވެސް އީރާނަށް ޕްރެޝަރު ކުރުމަށް ބޭނުންކުރާ އުކުޅެއް ކަމަށް ބެލެވެއެވެ.

މަސްރަހު ނުތަނަވަސްވުން

ސަރަހައްދީ މަސްރަހު އަދިވެސް އޮތީ ވަރަށް ނުތަނަވަސްކޮށެވެ. ވޭތުވެދިޔަ 24 ގަޑިއިރުގެ ތެރޭގައި އިސްރާއީލުގެ އުތުރު ބޯޑަރުގައި ހިޒްބުالله އިން ޑްރޯން ހަމަލާތަކެއް ދީފައިވާއިރު، އީރާނުގެ ރިވޮލިއުޝަނަރީ ގާޑްސް އިން ވަނީ އިރާގު ބޯޑަރު ކައިރީގައި ހުރި އެމެރިކާ އާއި އިސްރާއީލާ ގުޅުންހުރި ތަންތަނަށް ހަމަލާދީފައެވެ. އަދި ޔޫއޭއީގެ ބަރަކާ ނިއުކްލިއާ ޕްލާންޓަށް އަމާޒުކޮށް ދިން ޑްރޯން ހަމަލާއަކީ އީރާނުން މަޝްވަރާގެ މޭޒުގައި ބާރު ދެއްކުމަށް ކުރާ ކަމެއް ކަމަށް އިސްރާއީލުން ގަބޫލުކުރެއެވެ.

ވޮޝިންޓަނުން ގަލްފުގެ ގައުމުތަކަށް ޑިޕްލޮމެޓިކް ހައްލެއް ހޯދުމަށް ކުޑަ ފުރުސަތެއް ދިން ނަމަވެސް، އިސްރާއީލުގެ އަސްކަރިއްޔާ އޮތީ ތައްޔާރީ ހާލަތެއްގައިކަމަށް އެ ގައުމުގެ މީޑިއާއިން ބުންޏެވެ. އަދި އެ ގައުމުގެ އަސްކަރީ ވިސްނުމަކީ މަޝްވަރާތައް ނާކާމިޔާބުވެ، ވަރަށް އަވަސް މުސްތަގުބަލެއްގައި ބޮޑު ހަމަލާއެއް ދޭން ޖެހުންކަމަށް ވެސް ބުނެފަވެއެވެ/