ހުޅުމާލޭ ފުރަތަމަ ފިޔަވަހީގެ ނެއިބަރހުޑް އެކެއްގެ ރައްޔިތުންނަށް ޚާއްޞަކޮށްގެން، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބިނާކުރި ސްޕޯޓްސް ޕާކު ރަސްމީކޮށް އިފްތިތާޙުކޮށްފިއެވެ.

ރޭ ބޭއްވި ޚާއްޞަ ރަސްމިއްޔާތެއްގައި މި ޕާކު ހުޅުވައިދެއްވީ އެޗްޑީސީގެ މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް (ރިޓަޔަރޑް) ޢަލީ ޒުހައިރެވެ. ޕާކު ހުޅުވުމުގެ ރަސްމިއްޔާތަށްފަހު، އެ ތަނުގައި ގާއިމްކޮށްފައިވާ ތިން ދަނޑުގައިވެސް އެކި ކުޅިވަރުތަކުގެ މެޗުތައް ވަނީ ކުރިއަށް ގެންގޮސްފައެވެ.

Ad by Hajj Corporation

މި ސްޕޯޓްސް ޕާކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރައްޔިތުންނާ ބައްދަލުކުރެއްވުމަށް ބޭއްވެވި ޖަލްސާއެއްގައި، ނެއިބަރހުޑް އެކެއްގެ ރައްޔިތުން ކުޅިވަރު ކުޅޭނެ އެކަށީގެންވާ ވަސީލަތެއް ނެތްކަމަށް ފާހަގަކޮށް ހުށަހެޅި ކަންބޮޑުވުންތަކަށް ހައްލެއް ހޯއްދަވައިދެއްވުމުގެ ގޮތުން ބިނާކުރި ތަނެކެވެ.

ރައީސްގެ އިރުޝާދުގެ ދަށުން، އެޗްޑީސީން ވަނީ މި މަޝްރޫޢަށް ޚާއްޞަ އިސްކަމެއް ދީގެން، ރައްޔިތުންގެ އެދުމާ އެއްގޮތަށް ކުރު މުއްދަތެއްގެ ތެރޭގައި މަސައްކަތް ނިންމާލާފައެވެ.

ޒަމާނީ ފެންވަރަށް ފަރުމާކޮށްފައިވާ މި ސްޕޯޓްސް ޕާކުގައި ވޮލީ ކޯޓަކާއި، ބާސްކެޓްބޯޅަ ކޯޓެއްގެ އިތުރުން ފުޓްސެލް ދަނޑެއް ހިމެނެއެވެ.

މި ވަސީލަތްތަކާއެކު، ހުޅުމާލޭ ނެއިބަރހުޑް އެކެއްގައި ދިރިއުޅޭ ޒުވާނުންނާއި ކުޅިވަރަށް ޝައުގުވެރިވާ ފަރާތްތަކަށް ފަސޭހަކަމާއެކު ކުޅިވަރު ކުޅެވޭނެ މަގު މިވަނީ ތަނަވަސްވެފައެވެ. މިއީ ދުޅަހެޔޮ މުޖުތަމަޢެއް ބިނާކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން އެޅުނު މުހިންމު ފިޔަވަޅެއްގެ ގޮތުގައި އެޗްޑީސީން ސިފަކުރެއެވެ.