މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކުގެ ސަބަބުން މަސްވެރިންނަށް ދިމާވާ ދަތިތަކަށް ހައްލެއް ހޯދައިދިނުމަށް ސަރުކާރުން ފަށާފައިވާ މަސައްކަތުގެ ދަށުން، މިހާތަނަށް 2.5 މިލިއަން ލީޓަރުގެ ތެޔޮ ދޫކޮށްފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ހާމަކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ޝިޔާމް ވިދާޅުވީ، މަސްވެރިންނަށް ފޯރުކޮށްދެމުންދާ މި ޚިދުމަތަކީ މަސްވެރިންގެ ވަރަށް ބޮޑު އެދުމަކަށް ވެފައިވާތީ، އެސްޓީއޯ އަދި އެފްއެސްއެމް މެދުވެރިކޮށް ދެމުންގެންދާ ޚާއްޞަ ލުއިތަކެއް ކަމަށެވެ. މިއީ މަސްވެރިކަމުގެ ޚަރަދު ކުޑަކުރުމަށްޓަކައި ސަރުކާރުން އެޅި މުހިންމު ފިޔަވަޅެއްގެ ގޮތުގައި ވަޒީރު ސިފަކުރެއްވިއެވެ.

Ad by Hajj Corporation

ވަޒީރު ފާހަގަކުރެއްވި ގޮތުގައި، ރާއްޖޭގެ ހުރިހާ ސަރަހައްދަކަށްވެސް މިހާރު މި ޚިދުމަތް ވަނީ ފުޅާކުރެވިފައެވެ. މަސްވެރިންނަށް އެސްޓީއޯގެ އަގުގައި ތެޔޮ ލިބޭނެ ގޮތް ހެދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވައުދުފުޅެއް ކަމަށާއި، މީގެ ސަބަބުން މަސްވެރި އާއިލާތަކަށް މާލީ ގޮތުން ބޮޑެތި ލުއިތަކެއް ލިބިގެންދާނެ ކަމަށް ޝިޔާމް ވިދާޅުވިއެވެ. ތަފާސްހިސާބުތަކަށް އަލިއަޅުވާލައްވަމުން ވަޒީރު ވިދާޅުވީ، މިދިޔަ ފެބްރުއަރީ މަހުން ފެށިގެން މިހާތަނަށް 1832 އުޅަނދަކަށް މި ލުއި އަގުގައި ތެޔޮ ފޯރުކޮށްދީފައިވާ ކަމަށެވެ.

މި ޕްރޮގްރާމުގެ ދަށުން ތެޔޮ ދޫކުރުމުގައި އުޅަނދުފަހަރުގެ ބޮޑުމިނަށް ބަލައި ވަކި އުސޫލުތަކެއް ވަނީ ކަނޑައަޅާފައެވެ. އެގޮތުން މަސްވެރިކަމާ ބެހޭ ވުޒާރާއިން މައުލޫމާތު ދެއްވާ ގޮތުގައި:

85 ފޫޓަށްވުރެ ބޮޑެތި ދޯނިތަކަށް 5000 ލީޓަރު

50 ފޫޓާއި 85 ފޫޓާ ދެމެދުގެ އުޅަނދުތަކަށް 3000 ލީޓަރު

50 ފޫޓަށްވުރެ ކުދި އުޅަނދުތަކަށް 1500 ލީޓަރު

މި މިންވަރަށް ތެޔޮ މިފްކޯ މެދުވެރިކޮށް މިހާރު ދޫކުރަމުންދާ ކަމަށް އެ ވުޒާރާއިން ވިދާޅުވެއެވެ. ސަރުކާރުގެ އަމާޒަކީ މަސްވެރިންނަށް ކުރިމަތިވާ ގޮންޖެހުންތައް ނައްތާލައި، މަސްވެރިކަމުގެ ސިނާއަތަކީ ފައިދާހުރި ދާއިރާއަކަށް ހެދުމެވެ.