ހުޅުމާލެ، ސްޓެލްކޯ ސަރަހައްދު ފަޅުތެރެއަށް ފޭބިފަހުން ޚަބަރެއް ނުވެގެން ހޯދަމުންދިޔަ މީހާ، މަރުވެފައި އޮއްވާ މިއަދު ފެނިއްޖެއެވެ.

މި ހާދިސާގައި ނިޔާވެފައިވަނީ ކ. ގުރައިދޫ، ރަތްވިލާގެ، އިބްރާހިމް ޝާކިރު (48 އަހަރު) އެވެ.

Ad by Hajj Corporation

ފުލުހުންގެ މެރިން ޕޮލިހުން މައުލޫމާތު ދީފައިވާ ގޮތުގައި، މި ހާދިސާގެ ރިޕޯޓް ލިބިފައިވަނީ އިއްޔެ އިރުއޮއްސި 18:30 ހާއިރުއެވެ. އިބްރާހިމް ޝާކިރު މޫދަށް ފޭބީ ހުޅުމާލޭ ސްޓެލްކޯ ސަރަހައްދާ ދިމާލުން ފަޅުތެރޭގައި އޮތް އުޅަނދެއްގެ ވަލެއް އެއްސުމަށްޓަކައެވެ. ނަމަވެސް، މޫދަށް ފޭބި ފަހުން އޭނާގެ އެއްވެސް ޚަބަރެއް ނުވެގެން ހޯދަން ފެށިއެވެ.

އޭނާ ހޯދުމުގެ މަސައްކަތުގައި ފުލުހުންގެ މެރިން ޕޮލިހާއި އެމްއެންޑީއެފް ކޯސްޓްގާޑުން ގުޅިގެން ވަނީ ހަރަކާތްތެރިވެފައެވެ. ގިނަ ވަގުތުތަކެއް ވަންދެން ހޯދުމަށްފަހު، އޭނާ ފެނިފައިވަނީ މަރުވެފައި އޮއްވައެވެ.

މި ހާދިސާއާ ގުޅިގެން ބަލަންޖެހޭ ކަންކަން ފުލުހުން މިހާރު ދަނީ އިތުރަށް ތަހުގީގު ކުރަމުންނެވެ.