އައްސޭރި ޖަލުގައި ތިބި ޤައިދީންނާއި ބަންދުގައި ތިބި ފަރާތްތަކަށް ސިއްޙީ ފަރުވާ ފޯރުކޮށްދިނުމަށްޓަކައި، ހުޅުމާލޭ ހޮސްޕިޓަލާ ގުޅިގެން ޚާއްޞަ މެޑިކަލް ކޭމްޕެއް ކުރިއަށް ގެންގޮސްފިއެވެ.

މޯލްޑިވްސް ކަރެކްޝަނަލް ސަރވިސްއިން މަޢުލޫމާތު ދިން ގޮތުގައި، މި ކޭމްޕަކީ ޖަލުގައި ތިބި މީހުންގެ ތެރެއިން ޚާއްޞަ ބަލިތަކުގެ ޑޮކްޓަރުންނަށް ދައްކަންޖެހޭ ފަރާތްތަކަށް އެ ޚިދުމަތް ވީހާވެސް އަވަހަށް ފޯރުކޮށްދިނުމުގެ މަޤްޞަދުގައި ބޭއްވި ކޭމްޕެކެވެ.

Ad by Hajj Corporation

މި މެޑިކަލް ކޭމްޕްގައި އެތެރެހަށީގެ ބަލިތަކާއި، ކަށީގެ ބަލިތަކުގެ އިތުރުން ސާޖަރީގެ ޚާއްޞަ ޑޮކްޓަރުން ބަލިމީހުން ބައްލަވައި ފަރުވާ ދެއްވާފައިވެއެވެ. މި ދާއިރާތަކުން ޑޮކްޓަރަށް ދެއްކުމަށް ރިފަރކޮށްފައިވާ ޖުމްލަ 41 މީހަކަށް މި ކޭމްޕްގެ ތެރެއިން ކޮންސަލްޓޭޝަންގެ ޚިދުމަތް ވަނީ ދީފައެވެ.

ކަރެކްޝަނަލް ސަރވިސްއިން ބުނިގޮތުގައި، މިފަދަ ކޭމްޕްތަކުގެ ސަބަބުން ޖަލުގެ މާޙައުލުން ލިބެން ނެތް ސިއްޙީ ފަރުވާތައް، ރާއްޖޭގެ ސިއްޙީ ޚިދުމަތްދޭ މަރުކަޒުތަކާ ގުޅިގެން ފަސޭހަކަމާއެކު ފޯރުކޮށްދިނުމަށް މަގުފަހިވެގެންދާނެއެވެ.

މީގެއިތުރުން، ކުރިއަށް އޮތް ތަނުގައިވެސް އެކި ޖަލުތަކުގައި މިފަދަ މެޑިކަލް ކޭމްޕްތައް ސިލްސިލާކޮށް ކުރިއަށް ގެންދިއުމަށް ރޭވިފައިވާ ކަމަށްވެސް އެ ސަރވިސްއިން ވަނީ ހާމަކޮށްފައެވެ.