މޯލްޑިވްސް ފިޝަރީޒް އެންޑް އެގްރިކަލްޗަރަލް ކޮމްޕެނީ (މިފްކޯ) ގެ އުފެއްދުންތައް އާންމުންނަށް ފަސޭހަކަމާއެކު ފޯރުކޮށްދިނުމަށްޓަކައި އައްޑޫ ސިޓީ ހިތަދޫގައި އެ ކުންފުނީގެ އައު އައުޓްލެޓެއް ރަސްމީކޮށް ހުޅުވައިފިއެވެ.

އެކަމަށް ބޭއްވި ރަސްމިއްޔާތުގައި މި ފިހާރަ ހުޅުއްވައިދެއްވީ ކުޅިވަރާއި ބެހޭ ވަޒީރު ޢަބްދުﷲ ރާފިޢުއެވެ.

Ad by Hajj Corporation

މިއީ މާލެ ފިޔަވައި ރާއްޖޭގެ އެހެން ރަށެއްގައި މިފްކޯއިން ހުޅުވި ފުރަތަމަ ފިހާރައެވެ.

މި އައުޓްލެޓް ހުޅުވުމާއެކު އައްޑޫ ސިޓީގެ ރައްޔިތުންނަށް މިފްކޯގެ މަސްދަޅާއި، އެހެނިހެން އުފެއްދުންތައް ހެޔޮ އަގުގައި، މެދުނުކެނޑި ލިބޭނެ މަގު ފަހިވެގެންދާނެ ކަމަށް އެ ކުންފުނިން ބުނެއެވެ.

ހިތަދޫ އައިސް ޕްލާންޓް ކައިރީގައި ގާއިމުކޮށްފައިވާ މި ފިހާރައިން ހޯމަ ދުވަހުގެ ރެއިން ފެށިގެން އާންމުންނަށް ޚިދުމަތް ދޭން ވަނީ ފަށާފައެވެ. މިއީ އެ ސަރަހައްދުގެ ކާބޯތަކެތީގެ ރައްކާތެރިކަމާއި، މަސްވެރިކަމުގެ އުފެއްދުންތައް ފަސޭހައިން ލިބޭނެ އިންތިޒާމު ހަމަޖެއްސުމަށް އެޅުނު މުހިންމު ފިޔަވަޅެކެވެ.

މިފްކޯގެ އަމާޒަކީ ރާއްޖޭގެ އެކި ސަރަހައްދުތަކުގައި އެ ކުންފުނީގެ ވިއުގަ ފުޅާކޮށް، ރާއްޖޭގެ އިތުރުން ބޭރު ގައުމުތަކުގައިވެސް މިފްކޯގެ އުފެއްދުންތައް ފަސޭހައިން ލިބޭނެ އިންތިޒާމުތައް ހަމަޖެއްސުމެވެ. މިގޮތުން ލަންކާގައި ވެސް މިހާރު ވަނީ މިފްކޯގެ އައުޓްލެޓެއް ގާއިމުކޮށްފައެވެ.

މި މަޝްރޫއަކީ އެ ކުންފުނީގެ ވިޔަފާރި ފުޅާކުރުމަށް ކުރަމުންދާ މަސައްކަތްތަކުގެ ތެރެއިން ކުރިއަށް ގެންދެވުނު މަސައްކަތެކެވެ.