ގޭގެ ތެރޭގައި ނުފެންނަ ބާރުތަކެއް އުޅޭކަމުގެ އިހުސާސް ކުރެވެނީ ރޫހާނީ ކަންތައްތަކެއްގެ ސަބަބުން ނޫން ކަމަށާއި، އެއީ އިމާރާތްތަކުން އުފެދޭ އަޑުތަކެއްގެ ސަބަބުން ކުރިމަތިވާ ކަމެއް ކަމަށް އާ ދިރާސާއަކުން ދައްކައިފިއެވެ.

ސައިންސްވެރިން ކުރި މި ދިރާސާއިން ހާމަވާ ގޮތުގައި، ބައެއް ބާވަތުގެ ބާލިދީތަކާއި، އިމާރާތުގެ ހޮޅިތަކާއި، ފެންވައިރު ކުރާ ނިޒާމުތަކުން އުފެދޭ "އިންފްރާސައުންޑް" (infrasound) ގެ ސަބަބުން އިންސާނާގެ މޫޑަށް ނޭދެވޭ އަސަރުތަކެއް ކުރެއެވެ. މި އަޑުތަކަކީ އިންސާނުންގެ ކަންފަތަށް އިވޭ އަޑުތަކެއް ނޫން ނަމަވެސް، އޭގެ ސަބަބުން ބިރުގަތުމާއި ހާސްވުން ފަދަ އިހުސާސްތައް އުފެދި، އެއީ ރޫހާނީ ކަމެއް ކަމަށް ގަބޫލުކުރަން މަގުފަހިވެއެވެ.

Ad by Hajj Corporation

ކެނެޑާގެ މެކްއީވަން ޔުނިވަރސިޓީގެ ސައިކޮލޮޖިސްޓެއް ކަމަށްވާ ރޮޑްނީ ޝްމާލްޓްޒް ވިދާޅުވީ، "އިންފްރާސައުންޑްގެ ސަބަބުން ހަށިގަނޑަށް އުނދަގޫތަކެއް ކުރިމަތިވޭ. ރޫހާނީ ކަންތައްތަކަށް ގަބޫލުކުރާ މީހަކަށް މި އުނދަގޫތައް އިހުސާސްވުމުން އެއީ ފުރޭތައެއް ނުވަތަ ރޫހެއްގެ ކަމެއް ކަމަށް ނިންމޭ،" ކަމަށެވެ. ނަމަވެސް މިފަދަ ކަންކަމަށް ގަބޫލުނުކުރާ މީހަކަށް އެއީ ހަމައެކަނި ބާވެފައިވާ އިމާރާތެއްގެ ތެރޭގައި ހުންނަ އުނދަގޫ ގޮތެއްގެ ގޮތުގައި އިހުސާސްވާނެ ކަމަށް އޭނާ ފާހަގަކުރެއްވިއެވެ.

އިންފްރާސައުންޑަކީ 20 ހާރޓްޒް (Hz) އަށް ވުރެ ދަށް ފްރީކުއެންސީތަކުގައި ހުންނަ އަޑުތަކެވެ. މިއީ އިންސާނުންގެ ކަންފަތަށް އާންމުކޮށް އިވޭ މިންވަރަށް ވުރެ ދަށް މިންވަރެއް ނަމަވެސް، އިންސާނާގެ ސިކުނޑިއަށް މި ރާޅުބާނިތައް ދެނެގަނެވޭ ކަމަށް ދިރާސާތަކުން ދައްކައެވެ.

ޝްމާލްޓްޒް ވަނީ މިކަން ސާބިތުކުރުމަށްޓަކައި ޚާއްސަ ތަޖުރިބާއެއް ވެސް ކޮށްފައެވެ. ބިރުވެރި ތަނެއްގެ ގޮތުގައި ހަދާފައިވާ ތަނެއްގެ ތެރޭގައި އިންފްރާސައުންޑް އުފައްދާ ސްޕީކަރުތައް ބަހައްޓައިގެން ކުރި މި ތަޖުރިބާގައި، ސްޕީކަރުތައް ޖެއްސުމުން އެ ތަނުގައި ތިބި މީހުން މާ އަވަހަށް އެ އިމާރާތުން ނުކުންނަން މަސައްކަތްކުރިކަން ފާހަގަކުރެވުނެވެ.