ބަދުއަހުލާގީ އަމަލު ހިންގާ މަންޒަރު ފެންނަ ވީޑިއޯއެއް ހިއްސާކުރި މައްސަލައަކާ ގުޅިގެން ތަޙުޤީޤު ފަށާފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.

މި މައްސަލަ ފެންމަތިވެފައިވަނީ ޒިންމާދާރު މަޤާމެއްގައި ހުރި މީހަކު މިފަދަ ވީޑިއޯއެއް ހިއްސާކުރުމާ ގުޅިގެން އާންމުންގެ މެދުގައި ކަންބޮޑުވުން އުފެދިފައިވާ ދަނޑިވަޅެއްގައެވެ.

Ad by Hajj Corporation

ފުލުހުން މީޑިއާތަކަށް މައުލޫމާތު ދެމުން ބުނީ، ބަދުއަހުލާގީ އަމަލުތަކެއް ހިމެނޭ ކަމަށް ތުހުމަތު ކުރެވޭ ވީޑިއޯއެއް ވައިބާ ގްރޫޕެއްގައި ހިއްސާކުރި މައްސަލައެއް، މިދިޔަ މެއި މަހުގެ 27 ވަނަ ދުވަހު ށ. ގޮއިދޫ އިން ފުލުހުންނަށް ހުށަހަޅާފައިވާ ކަމަށެވެ.

މި މައްސަލައިގެ ތަޙުޤީޤުގެ ތެރެއިން، އެ ވީޑިއޯ ފެތުރި މައްސަލަ އާއި އެ ވީޑިއޯގައި ހިމެނޭ ކަމަށް ތުހުމަތު ކުރެވޭ ކަންކަން ފުލުހުން ދަނީ އިތުރަށް ބަލަމުންކަމަށް ވެސް ފުލުހުން ވަނީ ބުނެފައެވެ.

ސޯޝަލް މީޑިއާގައި އަޑުފެތުރިފައިވާގޮތުގައި މި މައްސަލައިގައި ތުހުމަތު ކުރެވެނީ އެ ރަށު މިސްކިތުގެ އިމާމަށެވެ. މައުލޫމާތު ލިބިފައިވާ ގޮތުގައި، މި މައްސަލައާ ގުޅިގެން އެ އިމާމު މިހާރު ވަނީ ވަޒީފާއިން ވަކިކޮށްފައެވެ.

ސޯޝަލް މީޑިއާގައި މިހާރު ދައުރުވަމުންދާ ސްކްރީން ޝޮޓުތަކުން ފެންނަ ގޮތުގައި، އެ އިމާމު ވަނީ ވައިބާ ގްރޫޕަކަށް އެ ވީޑިއޯ ފޮނުވާފައެވެ.

މި މައްސަލައަކީ ދީނީ ގޮތުންނާއި އިޖުތިމާއީ ގޮތުން ބޮޑު ކަންބޮޑުވުމެއް އުފެދިފައިވާ މައްސަލައެއްގެ ގޮތުގައި ފާހަގަކުރެވެއެވެ.