އއ. އަތޮޅުން ފުރައިގެން ދަތުރުކުރި ލޯންޗެއް ފަޅައިގެންގޮސް ދިޔަވެ އަޑިއަށް ދަނިކޮށް، އޭގައި ތިބި މީހުން ރައްކާތެރިކަމާއެކު ސަލާމަތްކޮށްފިއެވެ.

މި ހާދިސާ ހިނގާފައިވަނީ ކޮންސްޓަންސް ހަލަވެލި ރިސޯޓް ކައިރިން ދަތުރުކުރަމުންދަނިކޮށް 2026 މެއި 30 ވަނަ ދުވަހުގެ ދަންވަރު 01:45 ހާއިރު ކަމަށް ފުލުހުން މައުލޫމާތު ދީފައިވެއެވެ.

Ad by Hajj Corporation

ފުލުހުން ބުނި ގޮތުގައި، މި ހާދިސާ ހިނގުމާ ގުޅިގެން ލޯންޗުގެ ވެރިފަރާތުން ވަނީ ވަގުތުން އެ ސަރަހައްދަށް އިތުރު ލޯންޗެއް ފޮނުވާފައެވެ. ދިޔަވަމުންދިޔަ ލޯންޗުގައި އެ ވަގުތު ތިބި 20 މީހުން ވަނީ އެހީތެރިކަމަށް ދިޔަ ލޯންޗަށް ރައްކާތެރިކަމާއެކު ބަދަލުކޮށްފައެވެ. މި ހާދިސާގައި ސަލާމަތްކުރި މީހުންގެ ތެރޭގައި ފަތުރުވެރިންވެސް ހިމެނޭ ކަމަށް މައުލޫމާތު ލިބެއެވެ.

އުޅަނދުގެ ވެރިފަރާތުން ފުލުހުންނަށް މައުލޫމާތު ދީފައިވާ ގޮތުގައި، މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. އަދި ލޯންޗުން ސަލާމަތްކުރި އެންމެންގެ ހާލުވެސް ރަނގަޅު ކަމަށް އުޅަނދުގެ ވެރިފަރާތުން ކަށަވަރުކޮށްދީފައިވެއެވެ.

މި ހާދިސާއާ ގުޅިގެން ސޯޝަލް މީޑިއާގައި އާއްމުކުރި ވީޑިއޯތަކުން ފެންނަ ގޮތުގައި، ލޯންޗު ފަރަށް އެރުމުގެ ސަބަބުން ވަރަށް ބޮޑަށް ފަޅައިގެން ގޮސްފައިވެއެވެ. އަދި ލޯންޗު ބަންޑުން ޖަހާލާފައި އޮތް މަންޒަރުވެސް ވީޑިއޯއިން ފެނެއެވެ.

ހާދިސާ ހިނގި ވަގުތު ލޯންޗުން ދަތުރުކުރި މީހުން ތިބީ އެކި އެއްޗެހީގައި ހިފަހައްޓައިގެން ކަނޑުމަތީގައި ކަމަށް ވީޑިއޯއިން ފެނެއެވެ.